Такое меркаване было сфармулявана групай беларускіх экспертаў падчас візіту ў Брусель.

2-5 сакавіка эксперты Міжнароднага кансорцыюма «ЕўраБеларусь» па запрашэнні брусельскага офіса Фонда Генрыха Бёля наведалі з нефармальным візітам сталіцу Еўрасаюза. Беларускія эксперты сустрэліся з прадстаўнікамі Еўрапейскай камісіі, дэпутатамі дэлегацыі Еўрапейскага парламента па адносінах з Беларуссю.

У закрытым фармаце «lunch debate» прайшла сутрэча, на якой прысутнічалі супрацоўнікі Еўрапейскай камісіі, прадстаўнікі шэрагу еўрапейскіх фондаў і аналітычных цэнтраў. Асноўнае пытанне, вынесенае ў назву дэбатаў, тычылася эфектыўнасці палітыкі Еўрасаюза ў адносінах да Беларусі.

Дэбаты распачаліся з уступных прэзентацый беларускіх экспертаў.

На думку Уладзіслава Вялічкі, старшыні Міжнароднага кансорцыюма па еўрапейска-беларускім супрацоўнітве НДА «ЕўраБеларусь» і каардынатара сайта EuroBelarus.Info, змены ў еўрапейска-беларускіх адносінах у 2008 годзе адкрылі новыя магчымасці для беларускай грамадзянскай супольнасці. Але скарыстацца гэтымі магчымасцямі мажліва толькі пры ўмове яе рэальнага ўключэння ў працэс еўрапейска-беларускага дыялогу.

Андрэй Ягораў, эксперт Агенцтва гуманітарных тэхналогій, адзначыў, што Усходняе партнёрства можа стаць пляцоўкай для распрацоўкі новай стратэгіі Еўрасаюза — як для Беларусі, так і для краін рэгіёна. Сёння Еўропе патрэбная новая праактыўная дактрына знешніх адносін, без якой усе палітычныя захады і надалей будуць неэфектыўнымі. У распрацоўку гэтай дактрыны павінны быць уключаны і беларускія інтэлектуальныя рэсурсы, лічыць эксперт.

Таццяна Пашэвалава, прадстаўнік ГА «Цэнтр сацыяльных іннавацый» і эксперт мерапрыемстваў Еўрапейскай камісіі па падтрымцы супрацоўніцтва беларускіх НДА і мясцовых уладаў, акцэнтавала ўвагу на праблемным характары беларускага пытання для еўрапейскай палітыкі, неабходнасці сур’езных даследаванняў сітуацыі Беларусі. Без гэткага падыходу адэкватную і эфектыўную палітыку не выбудаваць. Імітацыя дэмакратычных змен замест змен рэальных — гэта ўласцівасць усіх постсавецкіх палітычных рэжымаў. Каб не патрапіць чарговым разам у гэтую пастку, неабходна забяспечыць адэкватныя механізмы грамадскага кантролю і ўдзелу грамадзянскай супольнасці ў працэсе пакуль яшчэ віртуальнай беларускай лібералізацыі.

На сустрэчы з прадстаўнікамі дэлегацыі Еўрапейскага парламента па адносінах з Беларуссю былі падняты актуальныя пытанні ўдзелу Беларусі ў ініцыятыве «Усходняе партнёрства» і працягу часовай адмены некаторых санкцый.

Ці варта надаваць Беларусі статус поўнага партнёрства? Ці мэтазгодна запрашэнне Аляксандра Лукашэнкі да ўдзелу ў Саміце Усходняга партнёрства? — былі пастаўленыя дэпутатамі пытанні.

Пазіцыя беларускага боку была агульнай у адносінах да таго, што Беларусь не можа быць выключана з Усходняга партнёрства, але ж канкрэтныя формы і механізмы гэтага ўдзелу, як і фармат самога Усходняга партнёрства, мусяць быць дадаткова скарэктаваныя. Вяртанне санкцый не было б эфектыўным крокам, адзначылі эксперты з Беларусі. Еўрапейскія структуры мусяць звяртаць увагу не толькі на рэакцыі беларускага кіраўніцтва, але і на тыя спадзяванні і перспектывы, якія беларуска-еўрапейскае супрацоўніцтва адкрывае для беларускага грамадства.

EuroBelarus.Info