Святло ў канцы тунэлю, куды трапіла беларуская эканоміка, уладам краіны хацелася б бачыць з зеленаватым адлівам. Менавіта на павелічэнні крэдытнага партфелю грунтуецца ўся антыкрызісная праграма беларускага ўраду.

Леанід Злотнікаў, эканаміст:

«Нават калі ўсе крэдыты Беларусь атрымае, гэта не вырашыць праблемаў беларускай эканомікі. Або вырашыць іх на 3-4 месяцы».

Але нават перадышка ў выглядзе некалькіх месяцаў наўрад ці наступіць. Бо шанцы на атрыманне крэдыту з боку Міжнароднага валютнага фонда эксперты ацэньваюць як вельмі нізкія. Бо нягледзячы на бяду, сяброўскіх пачуццяў з Захаду Лукашэнку чакаць не выпадае — мяркуе былы памочнік дзяржсакратара ЗША, выканаўчы дырэктар праваабарончай арганізацыі Freedom House.

Дэйвід Крэймер, выканаўчы дырэктар Freedom House, ЗША:

«Беларусь стаіць перад пагрозай эканамічнага краху. Больш за тое, Лукашэнка закручвае гайкі, як мы ўбачылі і 19 снежня, і пасля. Усё гэта кажа пра тое, што сітуацыя ў Беларусі — у самай крытычнай кропцы. На мой погляд, Захад цяпер мусіць толькі ўзмацніць ціск, а не дапамагаць Лукашэнку».

Такія ж меркаванні гучаць і з боку Еўрапейскага Саюза. Міністр замежных справаў Швецыі Карл Більд заявіў, што дапамогі Захаду не будзе, пакуль улады краіны не зменяць уласнай палітыкі.

У сваю чаргу зварот да МВФ можа быць сігналам афіцыйнага Мінска пра гатоўнасць распачаць гандаль палітвязнямі. Аднак калі Захад і пойдзе чарговы раз насустрач уладам Беларусі, гэтая супраца будзе залежыць ад таго, ці сапраўды ў Беларусі наступіць адліга. Не толькі палітычная.

Андрэй Ягораў, палітолаг:

«Натуральна, што ў блок рэкамендацый МВФ можа ўваходзіць палітычная лібералізацыя, як інстытуцыйная ўмова развіцця бізнесу і гарантыя для замежных інвестыцый».

У самім Фондзе пакуль не каментуюць шанцаў Беларусі на крэдыт. Але згодна з працэдурамі, нават станоўчага рашэння рады дырэктараў МВФ давядзецца чакаць як мінімум да верасня. Да гэтага ж часу адсутнасць маштабных стабілізацыйных уліванняў у эканоміку будзе азначаць далейшае аслабленне нацыянальнай валюты, рост коштаў і з'яўленне дэфіцыту. Іншымі словамі, зніжэнне ўзроўню жыцця грамадзянаў. Першыя сімптомы гэтага ўжо бачныя ў сталічных крамах.

Валянціна Рудкоўская, універсам «Сухараўскі», Мінск:

«У нас ідзе замяшчэнне тавару больш дарагога на больш танны, але не значыць, што няякасны».

Нягледзячы на запэўніванні прадаўцоў пра якасць танных тавараў, ад дасведчаных спажыўцоў праўды не схаваць. Як і разумення тэндэнцыі.

Мінчук:

«Паліў «West», потым «Мінск» купіў, хутка да «Прымы» дойдзем. А потым тытунь будзем вырошчваць. У маёй бабулі ёсць надзельчык, ужо думаю тытунь вырошчваць».

Пакуль жа ўрад Беларусі як наркаман імкнецца ўсё шчыльней пасадзіць эканоміку краіны на крэдытную іглу. Рэальнае ж выйсце з крызісу будзе звязанае з балючаю ломкаю ўсёй пабудаванай за апошнія 17 гадоў сацыяльна-палітычнай мадэлі.

Belsat.eu