Інстытут палітычных даследаванняў «Палітычная сфера» супольна з Лятучым універсітэтам і Міжнародным кансорцыумам «ЕўраБеларусь» абвесцілі набор матэрыялаў у спецыяльны нумар часопіса «Палітычная сфера» па тэме: «Інтэлектуальная сітуацыя Беларусі».

Асноўная тэма нумара:

Інтэлектуальная сітуацыя ў Беларусі, вызначэнне этапаў яе фармавання, асноўных характарыстык, сучасных праблем і выклікаў, узаемасувязь інтэлектуальнай сітуацыі, стану акадэмічнай супольнасці і развіцця культуры, пазначэнне перспектыў, кропак найбольшага напружання і працы для сённяшняй інтэлектуальнай і акадэмічнай супольнасці.

Плануецца, што аснову спецыяльнага тэматычнага нумара часопіса «Палітычная сфера» складуць матэрыялы канферэнцыі «Інтэлектуальная сітуацыя Беларусі: абставіны і самавызначэнне мыслення», якая адбылася ў Мінску 14-15 снежня 2012 года. Таксама запрашаюцца да публікацыі аўтары, якія не бралі ўдзел у канферэнцыі, але гатовы прадставіць артыкулы па аналізу інтэлектуальнай сітуацыі ў Беларусі і развіцця акадэмічнай супольнасці.

Што вызначае і з’яўляецца падставамі для нашых планаў, перспектыў, інтэлектуальных і дзейнасных памкненняў? Праз якія канцэпты, паняткі і схемы мы апісваем і тлумачым сваю сітуацыю? У якім кірунку развіваецца інтэлектуальная і культурная прастора незалежнай Беларусі? Да чаго мы прыйшлі за 20 год? Якія магчымасці і перспектывы ўзнікаюць зараз? Ці можа акадэмічная і інтэлектуальная супольнасць зрабіць свой унёсак у разгортванне сітуацыі? У якім кірунку трэба рухацца?

Гэтыя пытанні патрабуюць рэфлексіі, аналізу, канцэптуальных і праграмных прапаноў.

Асноўная праблематыка нумара:

1. Інтэлектуальная сітуацыя: асноўныя характарыстыкі нашага часу.
2. Праблемы і выклікі сучаснага беларускага мыслення.
3. Акадэмічная і інтэлектуальная супольнасць: пытанні камунікацыі і самастойнага развіцця.
4. Сацыяльны і культурны кантэкст развіцця беларускага мыслення.

Да друку прымаюцца матэрыялы на беларускай, рускай і англійскай мовах.

Артыкулы ў часопісе друкуюцца на беларускай і рускай мовах. Рэдакцыя самастойна ажыццяўляе пераклад.

У рэдакцыю прадстаўляецца арыгінальны тэкст, які ніколі да таго не друкаваўся ні ў выглядзе асобнага артыкула, ні як частка манаграфіі.

Артыкулы, дасланыя ў рэдакцыю, праходзяць абавязковае ананімнае навуковае рэцэнзаванне.

Больш падрабязна пра патрабаванні і правілы афармлення глядзіце, калі ласка, глядзице па спасылцы.

Матэрыялы для друку прымаюцца да 20 верасня 2013 года.

Планаваны час выхаду нумара: канец 2013 года.

Кантактны адрас электроннай пошты: [email protected].

Аб часопісе:

Часопіс палиіычных даследаванняў «Палітычная сфера» — вядучае спецыялізаванае выданне па палітычных і сацыяльных навуках у Беларусі. Часопіс друкуе вынікі навуковых даследаванняў з розных галін палітычнай навукі і сумежных дысцыплін. Усе артыкулы часопіса праходзяць ананімнае акадэмічнае рэцэнзаванне. Адпаведнасць навуковым стандартам, а таксама эмпірычны ці тэарэтычны ўнёсак у разуменне палітыкі, з’яўляюцца крытэрыямі для публікацыі. Выданне ўключанае ў шэраг міжнародных баз навуковых публікацый, у прыватнасці: Central and Eastern European On-line Library, а таксама рэферуецца ў International Political Science Association (IPSA) Abstracts. Часопіс выдаецца з 2001 года.