Філосаф і метадолаг Уладзімір Мацкевіч, каментуючы трагічныя падзеі на кіеўскім Майдане, адзначыў, што смерці можна было чакаць з самага пачатку гвалтоўных дзеянняў.

«А што ж вы хацелі? Калі для такога інтэнсіўнага пратэстнага натоўпу не высоўваюцца рэалістычных і дасягальных мэт, няма плана дзеяння, а прапаноўваецца толькі стаяць і чакаць, то рана ці позна паўстануць радыкальныя думкі. У выніку якіх пачнецца раскол еднасці, людзі з рознымі настроямі пачнуць цягнуць справу ў розныя бакі. У такой сітуацыі да гвалту застаецца адзін крок. І гэты крок на Майдане ўжо зроблены, на жаль. А калі пайшоў гвалт, то там і смерці. Мы — смяротныя людзі, таму гэта было зразумела адразу, што там, дзе гвалт, побач стаіць смерць. І гэта мусіць быць зразумела і тым, хто кіруе Еўрамайданам», — сказаў Уладзімір Мацкевіч.

Таксама філосаф адзначыў, што сітуацыю працяглага супрацьстаяння немагчыма ўявіць у Беларусі, дзе ўлады скіраваныя на неадкладнае прымяненне сілы для падаўлення супраціву:

«Лукашэнка павінен лічыць украінскія ўлады мяккацелымі і нерашучымі. Бо ў той палітыцы, якую вядзе беларускі рэжым, трываць не толькі два месяцы, а нават некалькі дзён такую пратэстную актыўнасць немагчыма. Беларускія ўлады рэагавалі б рашуча і адразу, не спыняючыся перад гвалтоўнымі захадамі, як гэта было прадэманстравана ў снежні 2010 года. Той разгон Плошчы — не выпадковае здарэнне, яно цалкам ўпісваецца ў палітычныя погляды беларускай улады. На гэтым фоне ўкраінскі рэжым выглядае нерашучым, непаслядоўным, занадта ліберальным. Я думаю, што менавіта такое стаўленне ў Лукашэнкі да ўкраінскіх улад».

Радыё «Свабода»