Аляксандр Лукашэнка чарговы раз публічна прысягнуў на вернасць Крамлю і фактычна стаў на яго бок у крымскім канфлікце. І хоць адкрыта захопу паўвыспы Расіяй ён не падтрымаў, затое выказаў гатовасць разам супрацьстаяць Захаду. Гэтак, на просьбу кіраўніка Беларусі Крэмль размесціць на тэрыторыі нашай краіны паўтара дзясятка дадатковых расійскіх знішчальнікаў. З якою мэтаю?

«Беларусь адэкватна адрэагуе на ўзмацненне сіл НАТА ля нашых меж». Гэткі адказ Аляксандра Лукашэнкі на павелічэнне ўдвая колькасці знішчальнікаў F-16 на тэрыторыі Літвы ды Польшчы, а таксама на тэрмінова скліканыя натаўскія вучэнні. Захады былі зробленыя Паўночнаатлантычным альянсам у сувязі з апошнімі падзеямі ва Украіне. Лукашэнка пабачыў у гэтым пагрозу для Беларусі.

Аляксандр Лукашэнка, кіраўнік Беларусі:

«Гэтая эскалацыя адбываецца ўжо не ў Сірыі, не ў Лівіі ды не ў Іраку, гэта ўжо ля нашых меж. Гэта ўжо закранае нашыя інтарэсы. І мы як мышы пад венікам сядзець не маем права».

Адэкватным адказам на дзеянні НАТА, паводле кіраўніка краіны, будзе павялічыць і колькасць расійскіх Су-27 у Беларусі. Ажно да пятнаццаці адзінак. І пастанову ўжо прынялі. Але ці сапраўды ідэя належыць уладам Беларусі?

Андрэй Ягораў, палітолаг, Цэнтр еўрапейскай трансфармацыі:

«У сітуацыі, калі мы не маем незалежнасці вайсковага сектара Беларусі ды падпісаныя адпаведныя дамовы аб супольных войсках і гэтак далей, яны вымушаны дзеяць у адпаведнасці з жаданнямі Расіі».

Расія ж, паводле экспертаў, у новую халодную вайну, якую фактычна распачала праз анексію Крыма, жадае ўцягнуць і хаўрусніка. Лукашэнка, у сваю чаргу, апынуўся ў геапалітычным тупіку, бо дасюль не можа цвёрда стаць абедзвюма нагамі ні на адзін з бакоў канфлікту.

Аляксандр Алесін, вайсковы аглядальнік:

«Свае такія рэзкія выказванні аб украінскім пытанні, што ён будзе захоўваць кантакты, што будзе змагацца за цэласнасць Украіны, якія відавочна не падабаюцца шмат каму ў Крамлі, ён ураўнаважвае выказваннем, што ён верны хаўруснік».

Адсюль адначасовыя заявы і пра кантакты з Кіевам, і пра самалёты. Дарэчы, апошнія ў Беларусі наўрад ці застануцца надоўга, мяркуюць эксперты.

Аляксандр Алесін, вайсковы аглядальнік:

«Я думаю, яны тут пабудуць і паляцяць. Гэта не база. Базу створаць да 2015 года, і там размесцяць самалёты на сталай аснове, і падпішуць адпаведную дамову паміж Беларуссю і Расіяй. Таму я не прадбачу нейкіх наступстваў: ні прававых, ні вайсковых, ні ў галіне міжнароднай палітыкі».

Але ж ці не будзе наступстваў ад павелічэння вайсковай прысутнасці замежнай краіны?

Жыхары Мінска:

«Мы спакойная мірная краіна, мы нікому не пагражаем і на нас таксама, шчыра кажучы, ніхто не збіраецца нападаць».

«Калі было нешта дзіўнае ва Украіне, магчыма, нешта дзіўнае будзе і ў нас».

Што ж да Аляксандра Лукашэнкі, той прынамсі робіць выгляд, што ўпэўнены ў надзейнасці саюзнікаў, і што крымскага варыянту тут не будзе.

Аляксандр Лукашэнка, кіраўнік Беларусі:

«Вельмі танна. Калі нас хочуць напалохаць, гэта вельмі танна. Нас палохаць не трэба. Яшчэ раз падкрэсліваю, мы будзем дзеяць выключна ў адпаведнасці з нарматыўна-прававою базаю, якая існуе паміж Расіяй ды Беларуссю».

Якая, дарэчы, існуе і паміж Кіевам ды Масквою. Але, як відаць з падзеяў, ні дамова пра гарантыю цэласнасці Украіны, ні нават Будапешцкі мемарандум не перашкодзілі Крамлю ўчыніць акупацыю «братняе» дзяржавы.

«Белсат»