10 кастрычніка 2014 года ў межах цыкла лекцый «Авангард, мадэрнісцкая неакласіка, уяўленне» ў Мінску пройдзе публічная лекцыя брытанскай мастацтвазнаўцы Крысціны Лодэр.

Лекцыю супольна ладзяць Лятучы ўніверсітэт і Цэнтр сучасных мастацтваў.

Пачатак ХХ стагоддзя — найцікавейшы перыяд для даследчыкаў пераломных эпох. Змены ў сацыяльным жыцці, супярэчнасці ў палітычнай, эканамічнай, культурнай сферах сталі падставай для перагляду каштоўнасных арыенціраў у еўрапейскім грамадстве. Дынамічнасць новага часу задала і новы пульс культурнага жыцця, пра што сведчыць развіццё філасофіі, мастацтва, навукі, рэлігіі. Кожная з гэтых сфер можа стаць прызмай для аналізу тых трансфармацый, якія адбываліся ў грамадстве ў гэты час.

Прыклад мастацтва авангарду дазваляе нам убачыць культурна-цывілізацыйныя змены ў іх найбольш вострым, глыбокім адлюстраванні. У сваіх памкненнях знайсці стыль новага часу мастакі зыходзілі з пераканання, што зменлівы сусвет не можа быць увасоблены ў статычнай прасторы. Прадметам мастацкага аналізу становяцца дасягненні тэхнікі, фізічныя і касмічныя феномены, пераўтварэнні ў грамадстве.

Лекцыя брытанскай мастацтвазнаўцы, гісторыка мастацтва, даследчыцы рускага авангарду і канструктывізму Крысціны Лодэр «Казімір Малевіч і архітэктура супрэматызму» прысвечана руху Малевіча ад жывапісу да архітэктуры з дэталёвым абмеркаваннем асобных фактараў, якія абумовілі намер Малевіча развіваць супрэматычную архітэктуру, а менавіта — новая роля авіяцыі, утапічныя імпульсы рэвалюцыі, філасофія Мікалая Фёдарава, узаемадзеянне касмічных падарожжаў і сацыялізму ў навуковай фантастыцы Аляксандра Багданава, ідэі Канстанціна Цыялкоўскага і інш.

Чытайце інтэрв'ю з Крысцінай Лодэр, зробленнае напярэдадні лекцыі.

Публічная лекцыя Крысціны Лодэр «Казімір Малевіч і архітэктура супрэматызму» пройдзе 10 кастрычніка 2014 года ў Цэнтры сучасных мастацтваў (Мінск, вул. Някрасава, 3). Пачатак у 19.00. Уваход вольны!

На сайце Лятучага ўніверсітэта можна будзе пабачыць анлайн-трансляцыю лекцыі.

Нумар тэлефлефона для даведак: (+375 17) 2929336.

Пра лектара:

Крысціна Лодэр (Christina Lodder) - брытанскі мастацтвазнаўца, гісторык мастацтва, даследчыца рускага авангарду і канструктывізму. Віцэ-прэзідэнт Таварыства Малевіча. Ганаровы прафесар Эдынбургскага ўніверсітэта і Дзяржаўнага ўніверсітэта Кента. Аўтар шматлікіх артыкулаў па тэматыцы рускага авангарду і канструктывізму ў Расіі і Заходняй Еўропе.

UPD.: Відэазапіс публічнай лекцыі: