Фота: www.vebidoo.de

10 снежня, у сераду, у Мінску пройдзе чарговая лекцыя «другога сезона» адкрытых лекцый «Галоўнае пытанне».

Міжнародны кансорцыум «ЕўраБеларусь», Лятучы ўніверсітэт і «Беларусский журнал» запрашаюць на адкрытую лекцыю вядомага беларускага журналіста Андрэя Пачобута пад назвай «Тэрыторыя супрацьстаяння. Краіны Усходняга партнёрства паміж «Рускім светам» і еўраінтэграцыяй».

Чым еўрапейская ініцыятыва «Усходняе партнёрства» так напалохала Маскву? Ці можна было пазбегнуць канфлікту двух інтэграцыйных праектаў — еўрапейскага ды еўразійскага, ці гэты канфлікт быў наканаваным? Якія каштоўнасці ды перспектывы прапануюць гэтыя два праекты краінам былога СССР? Як украінскія падзеі паўплывалі на інтэграцыйныя праекты і як рэагуюць на гэтыя падзеі краіны Усходняга партёрства? І якія магчымасці да манёўру ёсць у Беларусі? Пра гэтыя сутнасныя пытанні паразважае ў сваёй лекцыі Андрэй Пачобут.

Адкрытая лекцыя Андрэя Пачобута «Тэрыторыя супрацьстаяння. Краіны Усходняга партнёрства паміж «Рускім светам» і еўраінтэграцыяй» адбудзецца 10 снежня 2014 года на пляцоўцы крэатыщнай прасторы «ЦЭХ» (Мінск, прасп. Незалежнасці, 58/6). Пачатак у 18.30. Уваход вольны!

Мерапрыемства пройдзе ў межах цыкла адкрытых лекцый «Галоўнае пытанне», першая частка якога была праведзена ў верасні-кастрычніку гэтага года. Калі ў  «першым сезоне» адкрытых лекцый пра «Галоўнае пытанне» разважалі сябры калегіума Лятучага ўніверсітэта — інтэлектуалы, навукоўцы, даследчыкі, то зараз да ўдзелу запрошаныя прадстаўнікі адной з самых дынамічных і праблемных сфер сучаснасці — сферы медыя, сродкаў масавай інфармацыі і камунікацыі.

UPD.: Відэазапіс адкрытай лекцыі:

Раней у цыкле «Галоўнае пытанне» адбылся адкрытыя лекцыі:

• Паўлюка Быкоўскага «Змены мадэлей медыяспажывання і выклікі традыцыйнай журналістыцы»;
• Виктора Малишевского «Невыносимая легкость нытия».