«Супрацоўнікі місіі АБСЕ паспрабуюць трапіць у раён баёў каля Дэбальцава», — паведаміў прадстаўнік місіі гэтай арганізацыі у інтэрв’ю Бі-бі-сі.

Напярэдадні міністр замежных спраў Украіны Павел Клімкін заявіў, што прарасійскія баявікі не пусцілі місію АБСЕ на Данбасе у раён баёў. Пры гэтым АБСЕ, якое мае сачыць за рэжымам прыпынення агню на Данбасе, кажа, што ў цэлым перамір’е выконваецца.

АБСЕ не мае рычагоў кантролю за перамір’ем на Усходзе Украіны, — мяркуе філосаф і метадолаг Уладзімір Мацкевіч.

Аднак паводле Уладзіміра Мацкевіча, гэтым разам хаваць адкрытую агрэсію Расіі і парушэнне дамоўленасцяў будзе цяжэй:

— Ужо падключыліся амерыканскія спадарожнікавыя сістэмы нагляду. Калі раней амерыканцы не дзяліліся з украінскім бокам і не спяшаліся абнародваць дадзеныя гэтай выведкі спадарожнікавай, то, здаецца, пасля Мінскіх пагадненняў, гэта ўжо становіцца здабыткам тых, хто ўзяў на сябе адказнасць за вырашэнне канфлікта — гэта дзяржавы: Нямеччына і Францыі, і, напэўна, у хуткім часе далучыцца да гэтага НАТО.

ЗША цягам апошніх дзён прадставіла некалькі здымкаў зробленых з сатэлітаў, якія пацвярджаюць удзел расійскіх войск у баявых дзеяннях у раёне Дэбальцава. Баі ў ваколіцах гэтага горада не сціхаюць, нягледзячы на перамір’е.

* * *

Беларускае кіраўніцтва не падтрымае Расію ў выпадку поўнамасштабнай вайны. Мяркуе беларускі Уладзімір Мацкевіч.

У эфіры Радыё Рацыя ён адзначыў, што, нягледзячы на значную прывязанасць да Расіі, афіцыйны Мінск спрабуе лавіраваць, каб не быць уцягнутым у расійска-ўкраінскі канфлікт. Ужо сёння бачна, што Расія не мае дастаткова рэсурсаў перамагчы ў супрацьстаянні з Захадам, лічыць Уладзімір Мацкевіч:

— Сённяшнія паводзіны Лукашэнкі паказваюць, што ён, маючы больш за нас інфармацыі аб сённяшніх падзеях, не спяшаецца заняць прарасійскую пазіцыю, нягледзячы на тое, што ён звязаны з Крамлём, з Масквой шэрагам пагадненняў. Хутчэй схіляецца да агульнасусветнай пазіцыі ў дачыненні да гэтай вайны. Гэта значыць, што ён бачыць хуткую, ці можа не зусім хуткую, а ў сярэднетэрміновай перспектыве, паразу Расіі.

Беларусь уваходзіць у Арганізацыю Дамовы аб калектыўнай бяспецы, ваенны блок створаны Масквой пасля развалу СССР. Паводле Дамовы, у выпадку небяспекі для адной з краін АДКБ, іншыя маюць вайскова яе падтрымаць.