Парадокс, але фактычнае развязанне вайны на ўсходзе Украіны і анексія Крыма толькі дадалі папулярнасці існаму кіраўніку Крамля. 15-годдзе першага абрання Пуцін сустрэў з рэкордным электаральным рэйтынгам і паказнікамі даверу ды ўхвалення ягонай дзейнасці.

Філосаф і метадолаг Уладзімір Мацкевіч лічыць, што рэйтынг і падтрыманне Пуціна ў Расіі створаныя цалкам штучна.

«Калі ж гаворым, што штучна, — гэта не значыць недарэчна ці ненатуральна, бо трэба паглыбіцца ў гісторыю, калі Пуціна выцягнулі з такога стану, калі яго ніхто не ведаў, калі ён быў цалкам нязначнай фігурай. Выцягнуўшы гэтую фігуру, расійскія спецслужбы і эліты, кіраваліся вельмі глыбокімі даследаваннямі стану расійскага грамадства. На момант міленіуму, змены тысячагоддзяў, расійскае грамадства было стомленае ад безыдэйнасці. Разам з Пуціным эліты расійскія прапанавалі насельніцтву місію і ідэю», — падкрэсліў адмысловец.

Пільных даследнікаў, якія разумелі, што адбываецца ў Расіі, непакоіў прыход Пуціна ва ўладу, бо было зразумела, што пуцінская місія пазначалася як аднаўленне імперыі. Аднак не ўсе, як на Захадзе, так і сярод расійскай інтэлігенцыі, заўважылі гэтую акалічнасць.

«Пуціну далі час, калі ён вырасціў сваю місію цэлым шэрагам дзеянняў. Ён фактычна згвалціў расійскае грамадства, калі можна казаць у Расіі пра грамадства, бо грамадзянскай супольнасці назіраецца там яшчэ меней, чым у Беларусі. Гэтак, з аднаго боку, адпавядаючы настроям насельніцтва, з другога — прапануючы ўтапічную і вельмі архаічную ідэю аднаўлення магутнасці імперыі, геапалітычнага гіганта, Пуцін здолеў знайсці падтрыманне і разуменне калі не абсалютнай большасці, то вельмі вялікай часткі расійскага грамадства», — заўважыў філосаф.

У гэтым жа заключаецца небяспека не толькі для развіцця Расіі, але і для ўсяго свету, падсумаваў сп. Мацкевіч.

Belsat.eu