Расія не гатовая да поўнамаштабнай вайны, мяркуе філосаф і метадолаг Уладзімір Мацкевіч.

Прадстаўнікі ФСБ паведамілі пра раскрыццё цэлай групы дыверсантаў з Украіны ў Крыме, а Пуцін выступіў з заявай пра «тэрор» з боку Украіны. Што насамрэч адбылося ў Крыме і да чаго гэта можа прывесці?

Філосаф і метадолаг Уладзімір Мацкевіч адзначыў, што для яго не было нічога дзіўнага ў навіне пра «ўкраінскіх дыверсантаў» у Крыме. Паводле адмыслоўца, назіраючы за тым, як Расія дзейнічае сёння ва Украіне, варта было чакаць чагосьці такога, бо сёння Расія вядзе псіхалагічную вайну супраць добраахвотнікаў, натраўліваючы іхныя групоўкі між сабою і ствараючы негатыўнае меркаванне пра іх ва ўкраінскім грамадстве.

«Што датычыць рэакцыі на гэта, то я б звярнуў увагу, што рэакцыя досыць сціплая і з боку сродкаў масавай інфармацыі, і з боку кіраўніцтва Украіны, бо, думаю, сітуацыя шытая белымі ніткамі і ўсе разумеюць, што гэта можа быць правакацыя, прычым ініцыяваная менавіта з расійскага боку», — адзначыў спадар Мацкевіч.

Расія заўсёды імкнула замкнуць перамоўны працэс у справе Данбасу на Мінскай групе, фармат якой цалкам задавальняе Крэмль, заўважыў метадолаг.

«Нармандскі фармат, больш шырэйшы і больш жорсткі да гэтай сітуацыі, заўсёды замінаў Пуціну і Крамлю весці сваю працу, тым больш, калі спатканне ў Нармандскім фармаце мае адбыцца адначасова з сустрэчай «Вялікай сямёркі», з якой Расію выключылі. Гэта будзе ствараць негатыўны кантэкст і фон для расійскай палітыкі. Таму, напэўна, дзеля зрыву сустрэчы ў Нармандскім фармаце магла быць зробленая ўся гэтая правакацыя», — мяркуе філосаф.

Як падкрэсліў адмысловец, Расія як вяла, гэтак і вядзе супраць Украіны гібрыдную вайну, якая выяўляецца ў падтрыманні ўзроўню напружанасці, падрыве аўтарытэту ўсіх дзяржаўных структур Украіны і распальванні варожасці паміж рознымі групоўкамі ва ўкраінскім грамадстве. На думку спадара Мацкевіча, менавіта на гэта накіравана ўся расійская палітыка.

«Ці гатовая Расія да поўнамаштабнай вайны — гэта вялікае пытанне. Мне падаецца, што яна не гатовая да такой вайны, і таму не хоча такой вайны насамрэч», — лічыць Уладзімір Мацкевіч.

10 жніўня ў ФСБ Расіі заявілі, што перадухілілі здзяйсненне тэрактаў у акупаваным Крыме на «крытычна важных абʼектах інфраструктуры і жыццезабеспячэння паўвостраву», якія нібыта рыхтавала Галоўнае ўпраўленне разведкі Міністэрства абароны Украіны. Расійскі бок паведамляў, што ў перастрэлцы загінулі два расійскія сілавікі.

Таксама ў ФСБ заявілі аб ліквідацыі «ўкраінскай агентурнай сеткі» і затрыманні групы «дыверсантаў».

Прэзідэнт Украіны Пётр Парашэнка назваў бязглуздымі і цынічнымі абвінавачванні Расіі ў адрас Украіны аб падрыхтоўцы тэрактаў у Крыме.

Больш — у відэаматэрыяле:

Belsat.eu