21 снежня 2016 года Беларуская нацыянальная платформа ФГС УП прыняла зварот у сувязі з тэрарыстычным нападам у Берліне, у выніку якога загінула 12 мірных людзей і пацярпела яшчэ каля 50 чалавек.

Зварот

Беларускай нацыянальнай платформы
Форума грамадзянскай супольнасці Усходняга партнёрства

«У сувязі з тэрарыстычным нападам у Берліне»

Петэру Дэтмару, амбасадару Федэратыўнай Рэспублікі Германія ў Рэспубліцы Беларусь

Андрэа Віктарын, кіраўніцы Прадстаўніцтва ЕС у Рэспубліцы Беларусь

21 снежня 2016 года

Мы, прадстаўнікі арганізацый грамадзянскай супольнасці Рэспублікі Беларусь, аб'яднаныя ў рамках Беларускай нацыянальнай платформы Форума грамадзянскай супольнасці Усходняга партнёрства, выказваем свае глыбокія спачуванні нямецкаму народу, чые грамадзяне ўвечары 19 снежня 2016 года пацярпелі ад жахлівага тэракту ў самым сэрцы краіны — Берліне, адным з самых міжкультурных і мірных гарадоў Еўропы.

У гэтыя дні ўся беларуская дэмакратычная супольнасць разам з вашай краінай перажывае адбыўшуюся трагедыю, глыбока смуткуючы аб ахвярах і пацярпелых — мірных людзях Германіі. Мы перадаем свае словы падтрымкі нямецкаму грамадству і, у асаблівасці, людзям, у чый дом прыйшла бяда.

Крывавы і цынічны акт тэрарызму здзейснены напярэдадні светлых сямейных святаў — Раства Хрыстова ды Новага года, каб застрашыць грамадзян Германіі, усёй Еўропы. На Калядным рынку Берліна нападу падвергнуліся не толькі мірныя жыхары, але і тыя каштоўнасці, якія глыбока падзяляем усе мы: свабода, роўнасць, дэмакратыя, гуманізм і, у першую чаргу, чалавечае жыццё, якое з'яўляецца безумоўнай вышэйшай каштоўнасцю само па сабе.

Асаблівае абурэнне выклікае той факт, што гэты тэрарыстычны напад накіраваны супраць краіны, якая шчодра дае прытулак мігрантам з краін, дзе ідуць войны. Сёння мы заклікаем усе цывілізаваныя краіны да аб'яднання ў адстойванні гэтых каштоўнасцей і супрацьдзеянні дзікаму і бессэнсоўнаму тэрарызму.

Мы заклікаем Еўрапейскі Саюз, краіны-партнёры Германіі ў барацьбе з міжнароднымі тэрарыстычнымі групоўкамі да прыняцця адэкватных мер бяспекі для абароны сваіх грамадзян. Разам з тым, гэтыя меры не павінны прывесці да распальвання нацыянальнай варожасці, росту ксенафобіі, радыкалізму, дыскрымінацыі і ўціску бежанцаў і нацыянальных меншасцей у краінах Еўропы. У адваротным выпадку мэты тэрарыстаў будуць дасягнуты.

Мы верым, што цывілізаваны свет зможа аб'яднацца і абараніць сваіх грамадзян і агульначалавечыя каштоўнасці. Вельмі важна зрабіць гэта праз салідарныя і асэнсаваныя дзеянні ў інтарэсах правоў чалавека і нашых народаў.

Беларускія арганізацыі грамадзянскай супольнасці — удзельнікі Беларускай нацыянальнай платформы Форума грамадзянскай супольнасці Усходняга партнёрства

Спампаваць тэкст 

Download text