Расія рыхтуе адзіную валюту для ЕАЭС, а ў Беларусі пра гэта ніхто нічога не гаворыць, здзіўляецца вядомы казахстанскі палітолаг.

Еўразійскі эканамічны саюз — мёртванароджаная арганізацыя, якая адстойвае выключна палітычныя інтарэсы Расіі, упэўненыя шмат хто з беларускіх экспертаў. Казахстанскі палітолаг Газіз Шаймердэн пацвярджае: сёння Расія робіць шэраг захадаў, якія можна назваць першымі спробамі адрадзіць Савецкі Саюз. І не падабаецца гэта не толькі беларусам.

Прэтэнзіі да Еўразійскага эканамічнага саюза Беларусь не саромеецца выказваць на самым высокім узроўні. У сваёй незадаволенасці беларусы не самотныя: прадстаўнікі Казахстана таксама заяўляюць, што саюз не адпавядае заяўленым мэтам і пакуль грае на карысць толькі аднаму ўдзельніку — Расіі. І чым далей існуе ЕАЭС, тым больш агрэсіўныя робяцца захады з боку Масквы.

«Я са здзіўленнем высветліў, што дыскурс, датычны адзінай электроннай валюты на прасторы ЕАЭС, у вас увогуле адсутнічае. У нас цяпер гэтае абмеркаванне ідзе вельмі актыўна. Ініцыятарам, безумоўна, выступаем не мы, у асноўным — расійскі бок. Адзінае, што было, — гэта заява ад нашага ўраду, што цяпер і ў найбліжэйшай перспектыве ўвядзенне адзінай валюты нават не разглядаецца», — распавёў Газіз Шаймердэн.

Але галоўным чынам размовы пра агульную валюту вядуцца з падачы расійскага боку, прапрацоўваецца і нават назва новай сумеснай валюты.

«Існуе нават некалькі варыянтаў назоваў — алтын, еўраз. Спасылаючыся на досвед Еўрасаюза, прапануюць увесці г.зв. электронную валюту. Калі яна будзе ўведзеная і абмежаваная толькі ўзаемаразлікамі недзе ў асобных галінах, то, у прынцыпе, напэўна, нічога страшнага няма. Але калі працэс пойдзе далей, то казаць пра эканамічную незалежнасць ужо не давядзецца», — дадаў Газіз Шаймердэн.

Чаму палітолаг лічыць прапановы ўвесці ў межах ЕАЭС адзіную валюту спробамі ўваскрэсіць Савецкі Саюз, і якія аб’яднанні дапамогуць постсавецкім дзяржавам супрацьстаяць Расіі?

Глядзіце ў поўным выданні праграмы «Размова дня» з Уладзімірам Мацкевічам і казахстанскім палітолагам Газізам Шаймердэнам: