Аўтары дакумента прыйшлі да высновы, што патэнцыял салідарнасці беларускага грамадства істотна ніжэйшы, чым патэнцыял салідарнасці ў грамадзянскай супольнасці.

Даследаванне выканана Цэнтрам еўрапейскай трансфармацыі (ЦЕТ) і Беларускім інстытутам стратэгічных даследаванняў (BISS) на замову: Беларускага дома правоў чалавека ім. Барыса Звозскага, Праваабарончага цэнтра «Вясна», Беларускага Хельсінкскага камітэта, Цэнтра прававой трансфармацыі (Lawtrend), Камітэта абароны рэпрэсаваных «Салідарнасць», Беларускай асацыяцыі журналістаў і Асамблеі няўрадавых дэмакратычных арганізацый Беларусі.

На папярэднім этапе даследавання патэнцыялу салідарнасці ў арганізаванай грамадзянскай супольнасці Беларусі была зроблена выснова аб дастаткова нізкім узроўні яго салідарнасці.

У выніковым дакуменце адзначана, што грамадства ў цэлым аказалася яшчэ менш структураваным, яшчэ больш пасіўным, абыякавым у каштоўнасным дачыненні, менш зацікаўленым у абмеркаванні палітычных і грамадскіх тэм, больш замкнёным у коле міжасабовых адносін, чым меркавалі даследчыкі. Патэнцыял салідарнасці беларускага грамадства апынуўся істотна ніжэй, чым патэнцыял салідарнасці ў грамадзянскай супольнасці.

Кола патэнцыйнай салідарнасці беларускага грамадства фактычна замкнёна на сям’і і сябрах, беларусы не асабліва разлічваюць на салідарнасць з боку іншых груп і супольнасцей. Патэнцыял узаемнага даверу і салідарнасці насельніцтва ў адносінах да грамадскіх і дзяржаўных інстытутаў вельмі нізкі. Беларусы не давяраюць ім і не разлічваюць на іх дапамогу і падтрымку, гэта ў тым ліку азначае, што яны наўрад ці адгукнуцца на іх заклік аб падтрымцы ў выпадку неабходнасці.

Паводле даследчыкаў, праваабарончыя і іншыя грамадскія арганізацыі карыстаюцца даверам не больш чым чвэрці насельніцтва.

Дарэчы, грамадзянская супольнасць, у параўнанні з грамадствам у цэлым, характарызуецца больш высокім узроўнем інстытуцыйнага даверу. У той жа час, кола гэтай салідарнасці замкнёнае на калегах па «трэцім сэктары» і не распаўсюджваецца нават на роднасныя грамадскія сектары тэрытарыяльных (суседзкіх) супольнасцей і царкоўных абшчын. Узровень даверу грамадзянскай супольнасці дзяржаўным інстытутам яшчэ больш нізкі, чым у насельніцтва ў цэлым.

Гл. поўны тэкст даследавання «Патэнцыял салідарнасці ў беларускім грамадстве»

belngo.info