Грошы інвалідаў забіраюць чыноўнікі? (Відэа)

10.11.2017
Belsat.eu

Праграма «Людскія справы» на «Белсаце» рыхтавалася з траўня — хацелі зрабіць рэпартаж з урачыстага адкрыцця ўнікальнай экасцяжыны ў Валожынскiм раёне для iнвалiдаў-вазочнікаў.

А атрымалася, што журналісты праінспектавалі працу арганізацый, якія мусяць апекавацца інвалідамі, ды знайшлі цікавыя моманты ў рэалізацыі іх праектаў.

Праект «Валожын без бар’ераў» накіраваны на стварэнне дасяжнага для людзей з інваліднасцю асяроддзя ў Валожынскім раёне. Менавіта на гэта Еўрасаюз выдзеліў грант на 1 млн. еўра. Рэалізуюць праект Валожынскі райвыканкам, Фонд «Інтэракцыя», Беларускае таварыства інвалідаў, Грамадскае аб’яднанне «Адпачынак у вёсцы».

Паводле праекта, у Налібоцкай пушчы мусіць з’явіцца экасцяжына для людзей з інваліднасцю, у самім Валожыне — хостэл і турыстычны інфармацыйны цэнтр. Апроч гэтага, у Валожынскім раёне мусяць зрабіць дасяжнымі да 30 грамадскіх аб’ектаў. 20 з іх да канца гэтага года.

«Ну зараз там перарабляюць, — распавядае па тэлефоне наш суразмоўца, прадстаўнік мясцовай супольнасці інвалідаў-вазочнікаў. — Там нязручнасці былі ў тым, што вазочніку немагчыма было ехаць па гэтай сцяжыне, няправільна былі зроблены пандусы. Лаўкі пабудавалі без спінак — як, напрыклад, інваліду з ДЦП сесці на гэтую лаўку?»

Менеджарка праектаў Фонда «Інтэракцыя» Ірына Іванова кажа, што экасцяжына — праект цалкам новы для Беларусі, які, да таго ж, рэалізуецца ў заказніку, дзе нельга ўжываць звыклыя матэрыялы і тэхналогіі — таму ў падрадчыка і будаўнікоў часцяком проста не хапае кампетэнцый.

У той жа час у Мінску

Да нас трапіў дакумент унутранай справаздачнасці Беларускага таварыства інвалідаў (БелТІ), згодна з якім на першым паверсе аднаго з жылых дамоў на вуліцы Нёманскай мусіў з’явіцца рэабілітацыйны цэнтр для людзей з інваліднасцю. Аднак на першым паверсе дома — гандлёвыя плошчы ды салоны.

«Нашыя інваліды маглі б тут лячыцца, дзеці з ДЦП, іншыя дзеці, быў ужо праект рэабілітацыйнага цэнтра», — абураецца старшыня Мінскай гарадской арганізацыі хворых на рассеяны склероз «Геном надзея» Аляксей Карчэўскі.

Старшыня Беларускага таварыства інвалідаў Уладзімір Патапенка кажа, што гэта інвестар вырашыў аддаць БелТІ памяшканні не на першым, а на другім паверсе будынку — а БелТІ было вымушанае пагадзіцца. Медычнай жа рэабілітацыяй БелТІ наагул ніколі не займалася, гаворка ішла пра рэабілітацыю творчую. На другім паверсе ў «Інвацэнтры» цяпер — выстава карцін.

Былая галоўная бухгалтарка БелТІ распавяла нам пра шматлікія фінансавыя парушэнні ў арганізацыі, з якімі яна не магла пагадзіцца і таму звольнілася.

Усё гэта мы абмяркоўваем у студыі «Людскіх справаў» разам з гасцьмі Ірынай Івановай, менеджаркай праектаў Фонда «Інтэракцыя», і Алёнай Зуйковай, аналітыкам Цэнтра еўрапейскай трансфармацыі.

Глядзіце выпуск праграмы «Людскія справы» цалкам на сайце тэлеканала «Белсат».

Падпісвайцеся на наш Telegram-канал
«Думать Беларусь»!


Другие публикации