У ацэнцы ўдзелу апазіцыі ў апошніх мясцовых выбарах трэба адштурхоўвацца ад таго, што ў Беларусі любыя выбары не з’яўляюцца дэмакратычнымі.

Пра гэта сказаў у каментары «Свабодзе» дырэктар Цэнтра еўрапейскай трансфармацыі, палітолаг Андрэй Ягораў.

Паводле палітолага, уласна праз выбары ў Беларусі нельга дасягнуць рэпрэзентацыі ў органах кіравання, у дадзеным выпадку ў мясцовых саветах. Значыць, удзел у выбарах павінен разглядацца найперш для вырашэння іншых палітычных задач.

«Дэмакратычныя сілы павінны дзейнічаць насуперак логіцы рэжыма. Дзейнічаць больш крэатыўна і асэнсавана для вырашэння сваіх задач. Гэта, напрыклад, набыццё новых прыхільнікаў, большая ўласная кансалідацыя, прасоўванне важных грамадскіх інтарэсаў і г.д. Але ж мы бачым, што апазіцыя зыходзіць не з гэтага. Яна ўдзельнічае ў гэтым выбарчым фарсе, нібыта ўяўляючы, што праходзіць рэальны працэс выбараў», — падкрэслівае Ягораў.

На ягоную думку, такім чынам дэмакратычная супольнасць «хутчэй падтрымлівае існую логіку палітычнага рэжыма, чым супрацьдзейнічае яму».

Спадзеў істотнай часткі апазіцыі на тое, што ўлады дадуць ёй у мясцовых саветах з дзесятак месцаў, Андрэй Ягораў называе «ні на чым не заснаваным».

«А ўлады чарговым разам выкарысталі альтэрнатыўныя палітычныя сілы для сімуляцыі выбарчага працэса, для большай ягонай легітымацыі. І цяпер скажуць: апазіцыя не здолела перамагчы, бо народ яе не падтрымлівае. Таму я не бачу ніякай эфектыўнасці ў дзеяннях апазіцыі», — кажа эксперт.

У нядзелю 18 лютага ў Беларусі прайшлі выбары дэпутатаў мясцовых саветаў. Паводле ЦВК, датэрмінова прагаласавалі рэкордныя 34,95%, але сумарная яўка недацягнула да рэкорда: 77,05%.

Выбары адбыліся, паводле папярэдніх звестак ЦВК, на 18110 акругах — на ўсіх, акрамя адной, дзе адзіны кандыдат зняў кандыдатуру яшчэ да пачатку выбараў.

Прадстаўнікі апазіцыйных партый не прайшлі ў абласныя і Мінскі гарадскі саветы.

Чытайце таксама: Андрей Егоров: Скучная кампания с традиционными фальсификациями