11-12 лютага ў Беларусі мусіць прайсці чарговы т.зв. «Усебеларускі народны сход», на які традыцыйна збяруць «наменклатурна-гаспадарчы актыў».

Падпісвайцеся на наш Telegram-канал «Думаць Беларусь»!

Аднак гэтым разам дадзеннае мерапрыемства выклікае алергію ў грамадства і прымушае дэмакратычныя сілы рашуча рэагаваць.

Які падыход да «Усебеларускага народнага сходу» варта абраць беларускаму грамадству і што можна чакаць ад сёлетняга мерапрыемства?

Пра гэта Леся Руднік з «Цэнтра новых ідэй» запыталася ў філосафа і метадолага Уладзіміра Мацкевіча.

— Што такое «Усебеларускі народны сход» і якую функцыю ён звычайна выконвае?

— Усе дыктатары грэбуюць правам, законам, парламентам, судом — усімі інстытутамі і працэдурамі прадстаўнічай дэмакратыі, лічачы іх перашкодай для сваёй абсалютнай улады і абвяшчаючы іх прыкрымі ўмоўнасцямі.

Замест прадстаўнічай дэмакратыі яны апелююць да «прамой дэмакратыі», абыходзячы ўсе інстытуты і працэдуры, звяртаюцца непасрэдна да народа. На функцыю «народа» яны прызначаюць старанна адабраных, падкантрольных і паслухмяных ім людзей.

Вось гэта і ёсць у нашым выпадку т.зв. «Усебеларускі народны сход».

— Якія пытанні будуць вырашаць на сёлетнім «сходзе»? Ці чакаць глабальных зменаў па пытаннях Канстытуцыі ці амністыі для палітзняволеных?

— У тэатры марыянетак, якія паказваюць народу, нічога ніколі не вырашаецца, проста ствараецца бачнасць падтрымкі дыктатара.

— А якая стратэгія па «Усебеларускім народным сходзе» патрэбная дэмакратычным сілам: ігнараванне, альтэрнатыўны сход, дыскрэдытацыя мерапрыемства, што ладзіць Лукашэнка?

— Да 2020 года правільна было ігнараваць такое махлярства, проста даючы яму ацэнку. Цяпер неабходны рашучы адказ — альтэрнатыўны народны сход. Ён не толькі неабходны, але і магчымы, калі б у нашых лідараў была палітычная воля, «дарожная мапа» і аналіз сітуацыі. Але, здаецца, мы выпускаем гэтую магчымасць.

Падпісвайцеся на наш Telegram-канал «Думаць Беларусь»: http://t.me/methodology_by!