6 кастрычніка 2014 года ў Лятучаым універсітэце ў межах курса «Ідэя ўніверсітэта. Уводзіны ва ўніверсітэцкую прастору і лад жыцця» Павел Баркоўскі і Таццяна Вадалажская выступілі з чацвёртай лекцыяй: «Універсітэт як супольнасць».

Пра курс «Ідэя ўніверсітэта. Уводзіны ва ўніверсітэцкую прастору і лад жыцця»:

Універсітэт — не проста ўстанова адукацыі; перш за ўсё, гэта ідэя, якая стварае адмысловую прастору, што на працягу стагоддзяў станавілася месцам развіцця еўрапейскай культуры, мыслення і адукацыі. Ствараючы Лятучы ўніверсітэт, мы імкнемся рэалізаваць Ідэю Універсітэта «тут і цяпер» — у Беларусі і для Беларусі. І гэтая задача патрабуе ад усіх, хто спрычыняецца да гэтай справы, быць дасведчаным у падставах і актуальных выкліках развіцця ўніверсітэцкай ідэі.

Праз гэты курс ствараецца магчымасць асэнсавана ўвайсці ва ўніверсітэцкую прастору, зразумець падставовыя ідэі, праблемы і канцэпты, на якіх будуецца Лятучы ўніверсітэт, разабрацца і самастойна вызначыцца з асабістым шляхам і траекторыяй па «нетрадыцыйнай» для сучасных ВНУ і адукацыйных праграм прасторы ўніверсітэта. Курс прызначаны для тых, хто мае памкненне ўвайсці ў прастору Лятучага ўніверсітэта і гатовы стаць не проста слухачом, а саўдзельнікам універсітэцкіх падзей.

У межах курса чальцы калегіума Лятучага ўніверсітэта — Таццяна Вадалажская, Уладзімір Мацкевіч, Ірына Дубянецкая, Павел Баркоўскі — прадстаўляюць сваю візію і разважанні па базавых пытаннях жыцця ўніверсітэта ў наступных лекцыях:

• Універсітэт як ідэя і феномен еўрапейскай культуры і мыслення;

• Універсітэцкая адукацыя: сучасныя выклікі і пошук;

• Універсітэт як прастора нараджэння эліт: гісторыя і сучаснасць;

• Універсітэт як супольнасць;

• Лятучы ўніверсітэт: прынцыпы і падставы арганізацыі, каштоўнасці і этас супольнасці.