На думку палітолага, нядаўняя спроба апазіцыйных палітыкаў аб’яднацца, хутчэй за ўсё, не будзе мець значных вынікаў. Бо гэтая кааліцыя лучыць «толькі вузкае кола людзей, нелегітымных і не вельмі моцных, каб уступаць хоць у нейкі дыялог з уладамі, каб хоць нешта зменяць у сітуацыі ў краіне», — мяркуе ён.

У Мінску распачала працу канферэнцыя Нацыянальнай платформы Форума грамадзянскай супольнасці. Гэтая структура — адзін з галоўных інстытуцыянальных гульцоў праграмы ЕС «Усходняе партнёрства». Праграма была прынятая Еўрапейскім Саюзам у 2009 годзе дзеля збліжэння з ЕС шасці краін Усходняй Еўропы, у тым ліку Беларусі.

Адною з найбольш актуальных праблем для экспертаў кіраўнік Цэнтра еўрапейскай трансфармацыі Андрэй Ягораў назваў адсутнасць «суб’екту, з якім улада пагадзілася б весці перамовы». Гэтая праблема абмяркоўвалася падчас мінулай канферэнцыі Нацыянальнай платформы, але з-за амбіцыяў апазіцыйных лідараў так і засталася не вырашанаю.

Паводле эксперта, больш эфектыўным было б аб’яднанне «палітычных суб’ектаў з суб’ектамі арганізаванай грамадзянскай супольнасці ды тымі сіламі, якія сёння з’яўляюцца ў выглядзе спантаннай грамадскай актыўнасці». Усе гэтыя сілы разам маглі б прымусіць улады пайсці на дыялог, мяркуе ўдзельнік канферэнцыі Наныянальнай платформы ФГС УП.

Belsat.eu