Патрабаванне не дапусціць размяшчэння на тэрыторыі Беларусі расійскіх вайсковых баз увойдзе ў праграмы ўсіх кандыдатаў ад Партыі БНФ на мясцовых выбарах. Пра гэта заявіў старшыня партыі Аляксей Янукевіч.

Падчас збору подпісаў за вылучэнне кандыдатаў у дэпутаты партыя правядзе Агульнанацыянальны дзень пікетаў супраць расійскіх вайсковых баз.

Асноўны акцэнт у выбарчых праграмах кандыдатаў ад партыі і руху БНФ будзе на агульнанацыянальныя праблемы. Галоўныя з іх — барацьба супраць размяшчэння на тэрыторыі Беларусі расійскіх вайсковых баз і за адмену «аўтапабору», — заявіў Аляксей Янукевіч:

«На трэцюю дэкаду студзеня мы плануем Адзіны агульнанацыянальны дзень пікетаў супраць расійскіх вайсковых баз. У гэты дзень падчас збору подпісаў усе кандыдаты ад Партыі БНФ і сябры іхніх каманд масава ў адзін час выйдуць на пікеты. У іх візуальным афармленні будзе прысутнічаць тэма расійскіх вайсковых баз. Толькі на гэтай тэме і будзе зроблены акцэнт падчас размоў з выбарцамі. Перадусім такія пікеты адбудуцца ў тых гарадах, дзе нашым актывістам раней адмовілі ў іх правядзенні. Мы разлічваем, што такіх пікетаў адбудуцца сотні — у адзін дзень і ў адзін час».

Аляксей Янукевіч і яго намеснік Ігар Лялькоў паведамілі, што БНФ вылучыць на мясцовыя выбары больш за 150 кандыдатаў, перадусім у абласныя і Мінскі гарадскі саветы. Пры гэтым лідэры БНФ не сумняюцца, што новыя выбары, як і папярэднія, не будуць ні свабоднымі, ні справядлівымі.

Тады журналісты пацікавіліся: а які сэнс удзельнічаць у такім фарсе?

Аляксей Янукевіч патлумачыў:

«Выбараў у Беларусі фактычна няма. Аднак Партыя БНФ ёсць. Нашыя лідэры ў рэгіёнах ёсць. Нашае бачанне альтэрнатыўнага развіцця краіны ёсць. І менавіта дзеля таго, каб паказаць людзям гэтую альтэрнатыву, каб больш людзей даведаліся пра нас і падтрымалі, мы і ўваходзім у гэтую кампанію».

Падобныя адказы гучаць і ад лідэраў некаторых іншых апазіцыйных партый, — заўважае дырэктар Цэнтра еўрапейскай трансфармацыі Андрэй Ягораў. — Гэта тлумачыцца тым, што яны не маюць асэнсаванай стратэгіі дзеянняў:

«Яны не жадаюць вырашаць рэальныя праблемы, якія ёсць сёння. Найперш — унутры стасункаў палітычнай апазіцыі, грамадзянскай супольнасці, незалежнага грамадства. Тады яны займаюцца рэагаваннем на бягучыя праблемы. А выбары і ёсць тая бягучая падзея, на якую трэба даваць адказ. Удзел у выбарчай кампаніі дазваляе загрузіць пэўнай працай партыйны актыў, які не павінен прастойваць. А іхныя тлумачэнні вельмі стандартныя і традыцыйныя. І чуем мы іх ужо, напэўна, гадоў дзесяць. Ні самі тлумачэнні, ні сама іхняя праца, на жаль, ні да чога сутнаснага не вядуць».

Мясцовыя выбары ў Беларусі прызначаныя на 23 сакавіка 2014 года.

Радыё «Свабода»