2-4 кастрычніка 2015 года ў літоўскім горадзе Коўна (Каўнас) адбудзецца V Міжнародны Кангрэс даследчыкаў Беларусі. На яго з’едуцца каля 450 навукоўцаў з 22 краін свету, каб абмяркаваць вынікі сваёй працы па даследванням Беларусi за год.

Кангрэс — найбуйнешая акадэмічная і экспертная падзея года, якую традыцыйна ладзіць Інстытут палітычных даследаванняў «Палітычная сфера». Праца навуковых секцый і панэлей будзе адбывацца ў сцянах Універсітэта Вітаўта Вялікага (Vytautas Magnus University).

У фокусе ўвагі навукоўцаў апынецца не толькі непасрэдна Беларусь, але і ўвесь рэгіён Цэнтральнай і Усходняй Еўропы. Шырокая праблематыка — ад эканомікі, палітыкі, міжнародных стасункаў да гісторыі, лінгвістыкі ды праблем культуры — будзе разглядацца цягам трох дзён.

У межах Кангрэса адбудзецца наданне Прэміі даследчыкам за найлепшую навуковую публікацыю па чатырох намінацыях: гісторыя, сацыяльна-палітычныя навукі, гуманітарныя навукі і даследаванні замежнікаў. Шорт-лісты прэтэндэнтаў на перамогу ўжо абвешчаныя.

Шмат увагі на сёлетнім Кангрэсе будзе нададзена пытанням бяспекі, паведаміў дырэктар «Палітычнай сферы» Андрэй Казакевіч. Гэта звязана з тэндэнцыямі ў нашым рэгіёне: падзеямі ва Украіне і агульным павышэннем напружнасці паміж Расіяй і Захадам. Дадзенай праблеме будуць прысвечаны некалькі навуковых панэлей. Пытанні еўразійскай інтэграцыі і пытанні міграцыі ў Беларусі і ў нашым рэгіёне таксама апынуцца ў цэнтры ўвагі даследчыкаў.

Ужо добрай традыцыяй для Кангрэса стала праца асобнай секцыі, прысвечанай гісторыі Вялікага княства Літоўскага, якая збярэ цэлую плынь гісторыкаў для буйных дыскусій і гэтым разам. Як і раней, будуць працаваць секцыі, прысвечаная пытанням развіцця эканомікі, новай і найноўшай гісторыі, мовы, культуры, літаратуры, рэлігіі, інтэлектуальных традыцый у Беларусі.

Міжнародная пляцоўка чакае для палемікі спецыялістаў практычна ўсяго спектру сацыяльна-палітычных і гуманітарных дысцыплін — як для абмеркавання, так і для атрымання інфармацыі.

Месца праходжання Кангрэса:

Lietuva, Kaunas, K. Donelaičio g. 58, Vytauto Didžiojo universitetas (Vytautas Magnus University).

Дата правядзення:

2-4 кастрычніка 2015 года.

Спампаваць падрабязную праграму Кангрэса і даведацца пра расклад працы секцый і панэлей можна па спасылцы.

Даведка:

Міжнародны Кангрэс даследчыкаў Беларусі заснаваны ў 2010 годзе прадстаўнікамі беларускай і літоўскай грамадскасці. Гэта самая прадстаўнічая штогадовая акадэмічная і экспертная падзея, у якой бяруць удзел усе асноўныя аналітычныя цэнтры даследванняў палітыкі, грамадства і культуры Беларусі. Кангрэс - выдатная магчымасць распрацоўкі новых жыццяздольных даследчых і грамадскіх праектаў, абмену меркаваннямі і ідэямі, усталявання нефармальных сувязяў з прадстаўнікамі экспертнай і акадэмічнай супольнасці Беларусі ды іншых краін.