25 лістапада 2015 года пачынае сваю працу ў новым сезоне семінар Беларускага калегіума і Інстытута «Палітычная сфера» — «Інстытуты і палітыка».

Уводзіны

Даследаванне палітыкі — гэта, галоўным чынам, даследаванне інстытутаў, а інстытуцыйнае вывучэнне палітычнага жыцця застаецца ўплывовым накірункам сучаснай палітычнай навукі. Тым не менш, гэта не здымае праблемы глыбіні разумення і практычнага прымянення падыходу. Семінар арганізаваны для вырашэння гэтых задач. У 2015-2016 гадах асноўны фокус увагі будзе засяроджаны на аналізе палітычных сеціваў (political networks analysis) і прыкладах яго прымянення пры даследаванні сучасных палітычных інстытутаў і палітычнай гісторыі.

Асноўная тэма — разгляд характэрных прыкладаў даследавання палітыкі і палітычнай гісторыі праз аналіз палітычных сеціваў (political networks) для цэласнага разумення магчымасцей і патэнцыялу гэтага метаду. У прыватнасці, плануецца разгледзець прымяненне падыходу да вывучэння: галасавання і палітычнага ўдзелу, сацыяльных рухаў, міжнародных стасункаў і знешняй палітыкі, палітычнай гісторыі эліт, а таксама бунтаў і рэвалюцый.

У прыватнасці, гэта працы: Роджэра Гоўлда (Roger Gould),  Дэвіда Нока (David Knoke), Джона Падгета (John Padgett), Крыстафера Ансэла (Christopher Ansell) і некаторых іншых.

Кампетэнцыі

Мяркуецца, што праца ў межах семінара дазволіць удзельнікам значна паглыбіць сваё разуменне палітыкі і палітычнай гісторыі, а таксама засвоіць метады і даследчыя схемы аналізу як палітычнай гісторыі, так і сучасных палітычных і сацыяльных працэсаў.

Удзельнікі

Да ўдзелу запрашаюцца студэнты старэйшых курсаў, магістранты, дактаранты, выкладчыкі сацыяльных і гуманітарных дысцыплін ды іншыя зацікаўленыя асобы.

Дысцыпліны

Семінар разлічаны на палітолагаў, гісторыкаў, сацыёлагаў, эканамістаў, філосафаў і прадстаўнікоў іншых дысцыплін, якія закранаюць даследаванне палітыкі.

Кіраўнік семінара

Андрэй Казакевіч — доктар палітычных навук (PhD in Political Science), дырэктар Інстытута палітычных даследаванняў «Палітычная сфера», судырэктар Беларускага калегіума.

Перыядычнасць і парадак працы

Пасяджэнні семінара плануюцца раз на два тыдні, па серадах, з 18.30 да 20.30.

Першае пасяджэнне — 25 лістапада 2015 года.

Каб запісацца на семінар, трэба запоўніць форму.

Дадатковыя пытанні вы можаце дасылаць на адрас электроннай пошты: [email protected].

Palityka.org