19 снежня 2015 года філосаф Ігар Бабкоў выступіў у Гомелі з лекцыяй, прысвечанай Ігнату Абдзіраловічу.

Ігнат Абдзіраловіч — аўтар маленькага эсэ «Адвечным шляхам» і вялікай ідэі «ліючайся формы». Амаль невядомы ў мінулым стагоддзі, цяпер ён выразна бачыцца намі як пачатак самастойнай беларускай традыцыи мыслення.

З аднаго боку, пачатак — радыкальнае абнуленне, анігіляцыя ўсяго папярэдняга, пункт зэро гісторыі. Але менавіта абнуленне дазваляе думаць традыцыю, а не проста яе даследаваць альбо канструяваць. Абдзіраловіч — гэта радыкальная заяўка на суб’ектнасць і разгортванне адмысловай беларускай метафізікі. Сёння, калі вялікія праекты здаюцца вычарпанымі і будучыню трэба ствараць нанова, вельмі дзейсным можа аказацца зварот да пачатку.

Лекцыя была прачытана ў межах Года беларускага мыслення і была зладжана Лятучым ўнівэрсітэтам у партнёрстве з грамадскай культурніцкай кампаніяй «Будзьма беларусамі!» і курсамі беларускай мовы «Мова Нанова».

Лекцыя Ігара Бабкова «Абдзіраловіч і беларуская традыцыя» — адна з пяці ў цыкле лекцый пра спадчыну Ігната Абдзіраловіча. У межах гэтага цыкла сваімі разважаннямі і рэфлексіямі таксама ўжо падзеліўся са слухачамі ў Гародні Павел Баркоўскі, а наперадзе — выступы Ірыны Дубянецкай, Міхаіла Баярына і Валянціна Акудовіча, якія пройдуць у студзені 2016 года ў Віцебску, Маладзечне і Магілёве.

UPD.: Сваімі думкамі ў межах цыкла лекцый, прысвечаных спадчыне Ігната Абдзіраловіча, падзяліліся: Павел Баркоўскі — у Гародні, Ірына Дубянецкая — у Віцебску, Валянцін Акудовіч — у Магілёве, Міхаіл Баярын — у Маладзечне і Сяргей Дубавец — Бабруйску. Цыкл завяршыла публічная дыскусія.

Відэазапіс лекцыі Ігара Бабкова ў Гомелі: