27 траўня 2016 года ў межах цыкла публічных лекцый «Уяўляючы Беларусь» адбудзецца лекцыя генеральнага дырэктара Бізнес-школы ІПМ Паўла Данэйкі «Выклікі будучыні: назад да сярэднявечча».

Ніводная краіна не можа быць прыкладам для Беларусі, бо трэба знаходзіць уласныя рашэнні ў сваёй краіне для ўласнага народа. Гэта як у асабістым жыцці: вы можаце мець нейкія ідэалы, але гэта вашае жыццё, вашае асяроддзе і вашая сітуацыя. Трэба шукаць уласнае развязанне. Трэба ствараць будучыню тут, а будучыня — гэта тваё асабістае вырашэнне тваіх асабістых праблем.

Мы жывем у кантэксце змены тэхналагічнай парадыгмы і пераходу ад фабрычнай вытворчасці да інфармацыйнага грамадства, дзе кіраваць будуць інтэлектуальныя эліты. Распаўсюд Інтэрнэта даў нам новыя магчымасці без пасярэднікаў вырашаць самыя розныя пытанні: ад элементарнага шопінгу да праблем палітычнага, эканамічнага, сацыяльнага характару. Краўдфандынг стаў нармальнай практыкай фінансавання праектаў. Танныя рэчы, створаныя 3D-прынтэрамі, кастамізацыя прадуктаў, доўгажыхарства — усё гэта не такія далёкія перспектывы нашага жыцця. Гэтыя тэндэнцыі сведчаць пра тое, што чалавецтва рухаецца ў свет, дзе зменіцца сам спосаб жыцця, а разам з гэтым роля і месца традыцыйных інстытутаў: дзяржавы, сям’і, працы.

Як будзе выглядаць сацыяльная арганізацыя будучыні? Якія з сусветных трэндаў ужо закранулі ці закрануць Беларусь у бліжэйшым часе? Якія бар’еры перашкаджаюць нам стаць часткай гэтых працэсаў і адказаць на выклікі будучыні?

27 траўня, у пятніцу, Лятучы ўніверсітэт і Цэнтр еўрапейскай трансфармацыі ў межах цыкла «Уяўляючы Беларусь: ідэі і вобразы для супольнай будучыні» запрашаюць на адкрытую лекцыю генеральнага дырэктара Бізнес-школы ІПМ Паўла Данэйкі «Выклікі будучыні: назад да сярэднявечча», якая пройдзе ў Галерэі «Ў» (Мінск, прасп. Незалежнасці, 37 а). Пачатак у 18.30.

На думку лектара, «сярэднявечча» — гэта менавіта той вобраз, які дазваляе нам зразумець новую сацыяльнасць, да якой вядуць сучасныя тэндэнцыі і трэнды. Гэта сацыяльнасць, дзе будуць дамінаваць індывідуальны падыход і лакальныя супольнасці, дзе шматлікія пытанні здравааховы, рынку працы будуць вырашацца на лакальным узроўні, а за дзяржавай будуць замацаваныя сістэмныя функцыі — такія, як абарона і бяспека. Сумнеўна? Правакацыйна? Прыходзьце спрачацца і дыскутаваць! Уваход на лекцыю вольны!

Чытайце таксама інтэрв’ю з Паўлам Данэйкам

У межах цыкла публічных лекцый «Уяўляючы Беларусь» выступілі з прамовамі:

• Уладзімір Мацкевіч: «Будучыня Беларусі: прагнозы, праекты, мары і фантазіі»;
• Ніна Даніленка: «Прагрэс генетыкі: новыя шляхі да здароўя і новыя праблемы этыкі»;
• Уладзімір Батаеў: «Новыя кропкі адліку і перспектыўныя сцэнары развіцця будучыні»;
• Сяргей Сахараў: «Плюс-мінус дваццаць гадоў: што адбываецца з медыя сёння і чым гэта адгукнецца заўтра?».

UPD.: Відэазапіс лекцыі: