Беларускае мысленне — гэта самаразуменне нацыі, шляхі асэнсавання яе сутнасці ды прызначэння, пошукі ідэнтычнасці на ростанях культурных уплываў ды традыцый.

Кажучы «мысленне» — разумеем не прафесійную ці карпаратыўную прыналежнасць, але здольнасць у любую эпоху выказвацца свабодна, свядома, крытычна ды абгрунтавана. Беларускае мысленне ёсць школай годнасці ды незалежнасці.

Апошні год вызначыўся шэрагам падзей, якія публічна і шырока прадстаўлялі беларускае мысленне як частку нашай культуры і ідэнтычнасці. Гэта кампанія «Цытуй сваё», выданне Анталогіі беларусскага мыслення «Код прысутнасці», абвяшчэнне конкурса эсэ «Інтэлектуальная спадчына Беларусі: постаці, ідэі і кантэксты».

«Тыдзень беларускага мыслення» ставіць на мэту прадстаўленне разнастайных форм і праяўленняў беларускага мыслення ў сучасным беларускім грамадстве, уключэнне інтэлектуальных здабыткаў у сучасную культуру і ідэнтычнасць, а таксама развіццё стасункаў інтэлектуальнай супольнасці з іншымі актарамі шырокага грамадскага працэсу.

Арганізатары прапануюць пазначыць прысутнасць і значнасць мыслення для беларускага грамадства шэрагам мерапрыемстваў для шырокай публікі і сродкаў масавай інфармацыі. Запрашаем грамадскія арганізацыі, даследчыя і культурніцкія суполкі і ініцыятывы, бізнес-арганізацыі, асобных інтэлектуалаў і экспертаў да ўдзелу ў распрацоўцы і правядзенні мерапрыемстваў у межах Тыдня.

Фармат падзей у межах Тыдня

Мэта Тыдня — прадставіць самыя розныя формы існавання і мовы мыслення: маналагічныя развагі на адвечныя ці суперактуальныя тэмы, дыялогі і дыскусіі, майстар-класы, прэзентацыі напрацовак і іншыя крэатыўныя формы.

Тэмы падзей у межах Тыдня:

• Постаці і асобы беларускага мыслення, сучаснікі і продкі, настаўнікі, вучні і пераемнікі;
• Актуальныя ідэі і праблемы, прадстаўленыя, як мысленне тут і цяпер;
• Мысленне ў самых розных галінах і сферах: адукацыя, эканоміка, палітыка, бізнес, культура, тэхніка, экалогія і г.д.;
• Розныя формы і «тэхналогіі» мыслення;
• Гісторыя ідэй і падзей у беларускім мысленні;
• Рэфлексія гісторы і сучаснасці;
• ...

Форма ўдзелу ў Тыдні

Мы запрашаем зацікаўленыя арганізацыі, групы і асобных удзельнікаў падаваць заяўкі на правядзенне мерапрыемстваў у межах Тыдня. Праграма будзе сфармаваная па выніках разгляду заявак.

Вітаецца ўдзел максімальна шырокага спектру ініцыятыў, фармальных і нефармальных арганізацый і суполак, асобных інтэлектуалаў і экспертаў. Вітаецца і заахвочваецца правядзенне мерапрыемстваў для шырокай аўдыторыі з розных рэгіёнаў Беларусі. Існуе магчымасць невялікай рэсурснай дапамогі ў арганізацыі асобных мерапрыемстваў Тыдня.

Заяўкі на ўдзел запаўняйце і дасылайце да 1 жніўня 2016 года.

Для атрымання больш дакладнай інфармацыі альбо тлумачэнняў звяртайцеся да арганізатараў праз адрас электроннай пошты: [email protected].

У арганізацыйны камітэт конкурса ўваходзяць:

Міжнародны кансорцыум «ЕўраБеларусь», Лятучы ўніверсітэт, Грамадская кампанія «Будзьма беларусамі!», Беларускі калегіум, «Мова Нанова», «Беларсский журнал», кнігарня «ЛогвінаЎ», Інстытут палітычных даследаванняў «Палiтычная сфера».