Тыдзень беларускага мыслення распачнецца з выставы «Cogito Albarutheniae. Панарама беларускага мыслення: энцыклапедыі, анталогіі, альманахі, зборнікі, кнігі, часопісы, перыёдыка».

Энцыклапедыі, анталогіі, альманахі, зборнікі, кнігі, часопісы, перыёдыкі — усяго больш за 200 аб’ектаў, якія прадстаўляюць самыя цікавыя інтэлектуальныя выдавецкія праекты ў Беларусі за апошнія 30 гадоў.

Беларускі калегіум, Лятучы ўніверсітэт і Міжнародны кансорцыум «ЕўраБеларусь» запрашаюць на выставу «Cogito Albarutheniae. Панарама беларускага мыслення»!

У адкрыцці выставы прымуць удзел стваральнікі прасторы сучаснага беларускага мыслення: Сяргей Дубавец, Валер Булгакаў, Уладзімір Мацкевіч, Ірына Дубянецкая, Таццяна Шчытцова, Уладзімір Някляеў, Ігар Бабкоў, Сяргей Санько ды інш.

Вядоўца імпрэзы — Валянцін Акудовіч.

Яшчэ 30 гадоў таму выразы «беларускае мысленне» ці «беларускі філосаф» гучалі ледзь не як аксюмарон. Цягам некалькіх папярэдніх стагоддзяў пры ўсіх уладах беларуская думка мэтанакіравана ігнаравалася, здушалася і заганялася ў фармат песень-жальбаў. Аднак пры першай гістарычнай магчымасці беларусы распачалі культурнае вызваленне стварэннем свайго інтэлектуальнага дыскурсу. Гэта выявілася ў другой палове 1980-х гадоў праз шматлікія філасофскія развагі ў самых розных выданнях, а ад пачатку 1990-х гадоў выбухнула вялікай колькасцю інтэлектуальных перыёдыкаў, часопісаў, зборнікаў, анталогій ды энцыклапедый.

Панарама беларускага мыслення «Cogito Albarutheniae» («Мыслю Беларусь») дазваляе пабачыць і ацаніць гэты фантастычны феномен і пераканацца, што Беларусь — краіна мысляроў.

Адкрыццё выставы адбудзецца 16 верасня 2016 года. Прэзентацыя, як і сама выстава, будзе праходзіць у прасторы «Корпус8» (Мінск, прасп. Машэрава, 9). Пачатак у 18.45. Уваход вольны!

Імпрэза пачнецца з музычнага суправаджэння гурта EVAND, аўтарская музыка якога, на погляд арганізатараў, вельмі выразна таніруе з гучаннем беларускага мыслення.

Гл. больш падрабязнасцей пра Тыдзень беларускага мыслення.

UPD.: Канцэрт гурта EVAND — падчас адкрыцця выставы:

Відэазапіс імпрэзы: