22 верасня 2016 года адбудзецца публічная лекцыя каардынатара таварыства «Зялёная сетка» Яраслава Бекіша «Не-уяўляючы Беларусь: тры зялёныя ўтопіі»

Публічная лекцыя будзе прачытана ў межах цыкла «Уяўляючы Беларусь: ідэі і вобразы для супольнай будучыні», які падчас Тыдня беларускага мыслення супольна ладзяць Лятучы ўніверсітэт і Міжнародны кансорцыум «ЕўраБеларусь».

Тры зялёныя ўтопіі — гэта тры абсалютызаваныя крайнасці таго, як можа ўсё стацца з пункту гледжання будучыні планеты. Што нас чакае наперадзе: тэхналагічны прарыў, які дазволіць усім жыць добра і шчасліва або катастрофа глабальнага маштабу, пасля якой нічога не застанецца? Ці магчымы трэці варыянт?

«Калі перад планетай раптам паўстане пытанне, каму пакінуць месца ў выратаваўчым карабліку, а каму прыйдзецца папрацаваць, але на квіток не прэтэндаваць, то ў ліку каго апынуцца беларусы? Як мы будзем вырашаць этычныя пытанні, ці гатовыя мы саступіць сваё месца або будзем змагацца за яго? Мы падумалі пра гэта?», — задаецца пытаннем Яраслаў Бекіш.

Апроч розных тэмаў пра культурную ідэнтычнасць, гістарычную справядлівасць і палітычную будучыню, беларусам неабходна паразважаць пра самаідэнтыфікацыю нацыі з пункту гледжання прыроды, размеркавання рэсурсаў, змены кліматычных умоваў існавання.

«Бо гэта экзатычна — у нас ніхто пра гэта не думае. Бо гэта актуальна — але пра гэта таксама ніхто думаць не хоча. Можна тысячы гадоў абмяркоўваць, як змяняецца адукацыю, як здараюцца крызісы, прыходзяць і сыходзяць палітыкі, а ў гэты час на нас няўхільна насоўваецца айсберг у выглядзе выклікаў, звязаных з прыродай. Але да іх гатовыя толькі пісьменнікі-фантасты, яны ўвесь час аб гэтым думаюць», — засяроджвае ўвагу Яраслаў Бекіш.

Пытанні ўстойлівага развіцця ў палітыцы і эканоміцы — гэта глабальны трэнд. У прэсе ЗША шмат абмяркоўваюць эксцэнтрычнасць аднаго кандыдата на прэзідэнты, але яшчэ і тое, што ў ягонай уладзе будзе «адмовіцца ўдзельнічаць у Парыжскім кліматычным пагадненні» і «аднавіць будаўніцтва нафтаправода Keystone». У Францыі да 2025 года збіраюцца скараціць долю атамнай энергетыкі з 76 да 50%.

«Калі беларусы захаваюцца як нацыя, усё будзе дрэнна: прыйдзецца змагацца, шмат працаваць, пацець, плаціць, і не толькі грашыма, можа быць, прыйдзецца нават ваяваць. Усё гэта вельмі цяжка. Але калі беларусы як нацыя існаваць перастануць, то ўсё будзе добра: мы станем гістарыка-культурнай спадчынай, а ў гістарыка культурнай спадчыны заўсёды ўсё добра», — падагульняе Яраслаў Бекіш.

Публічная лекцыя Яраслава Бекіша «Не-уяўляючы Беларусь: тры зялёныя ўтопіі» адбудзецца 22 верасня, у чацвер, у мінскай прасторы «Корпус8» (прасп. Машэрава, 9). Пачатак у 19.00. Уваход вольны!

Наступныя лекцыі цыкла «Уяўляючы Беларусь: ідэі і вобразы для супольнай будучыні»:

• 23 верасня (пятніца), 17.30-18.30 — Публічная лекцыя Змітра Задорына «Цэнтральная плошча як парок сэрца ў целе Мінска». Праз асэнсаванне гісторыі цэнтральнай плошчы Мінска, невырашальных праблемаў, звязаных з яе перабудовай, лектар разважае пра магчымасці яе «выздараўлення».
• 23 верасня (пятніца), 20.00-21.00 — Лекцыя з элементамі майстар-класа Ірэны Катвіцкай і Аляксея Варсобы (дуэт «АГАТА») «Беларусь праз музычную семантыку і сінтаксіс». Разважанне пра мысленне ў музыцы і інструментарый музычнага выказвання: музычны сінтаксіс і сэнсаўтваральныя адзінкі.
• 24 верасня (субота), 17.00-19.00 — Публічная лекцыя Ігара Бабкова «Уладзімір Абушэнка: рэканструкцыя ідэі». Разважанне пра Уладзіміра Абушэнку і ягоны час: рэканструкцыя кантэкста, жыццёвых і сацыльных дэкарацый, праектаў і схем думкі, месцаў і іх адсутнасці.

Усе лекцыі будуць праходзіць у прасторы «Корпус8» (Мінск, прасп. Машэрава, 9). Уваход вольны!

UPD.: Відэазапіс публічнай лекцыі: