23 верасня 2016 года ў Мінску адбудзецца публічная лекцыя з элементамі майстар-класа музыкаў гурта «АГАТА»: Ірэны Катвіцкай і Аляксея Варсобы.

Імпрэза пройдзе ў межах цыкла «Уяўляючы Беларусь: ідэі і вобразы для супольнай будучыні», які падчас Тыдня беларускага мыслення супольна ладзяць Лятучы ўніверсітэт і Міжнародны кансорцыум «ЕўраБеларусь».

У адрозненне ад слова, музыка не здольная сама растлумачыць свой сэнс — музычнае «маўленне» зусім не падобнае на «натуральную гаворку». Музыка — гэта заўсёды непасрэдны працэс слухання. Навык слухання — гэта навык уцягвання, чуласці і інтэрпрэтацыі. Калі б існаваў слоўнік музычных значэнняў, то музыка была б пазбаўлена сваёй «аб’ектыўнай» уласцівасці быць зразумелай для прадстаўнікоў розных культур — гэта адрознівае музыку «наогул» ад музыкі ў фальклоры, дзе яна, як правіла, выступае часткай рытуала і, такім чынам, валодае цалкам пэўным значэннем.

Разам з музыкамі гурта «АГАТА» запрашаем паразважаць пра:

• Фальклор як асяроддзе самаідэнтыфікацыі і механізмы яго функціянавання;
• Магчымасць і інструментарый музычнага выказвання: музычны сінтаксіс і сэнсаўтваральныя адзінкі ў музыцы.

Публічная лекцыя з элементамі майстар-класа Ірэны Катвіцкай і Аляксея Варсобы (гурт »АГАТА») «Беларусь праз музычную семантыку і сітнаксіс» адбудзецца 23 верасня, у пятніцу, у прастора «Корпус8» (Мінск, прасп. Машэрава, 9). Пачатак у 20.00. Уваход вольны!

У суботу пройдзе заключная лекцыя цыкла «Уяўляючы Беларусь»:

• 24 верасня, 17.00-19.00, прастора «Корпус8» (прасп. Машэрава, 9) — Публічная лекцыя Ігара Бабкова «Уладзімір Абушэнка: рэканструкцыя ідэі». Разважанне пра Уладзіміра Абушэнку і ягоны час: рэканструкцыя кантэкста, жыццёвых і сацыльных дэкарацый, праектаў і схем думкі, месцаў і іх адсутнасці. Уваход вольны!

Раней ужо адбыліся наступныя лекцыі цыкла:

• 20 верасня — Публічная лекцыя Уладзіміра Галянкова «Інтэлектуальныя сістэмы: праблемы і перспектывы» (Фота і відэа).
• 21 верасня — Публічная лекцыя Уладзіміра Мацкевіча «Людзі, машыны, жывёлы: сяброўства і спакуса».