26 лістапада 2016 года Лятучы ўніверсітэт і Міжнародны кансорцыум «ЕўраБеларусь» у межах цыкла «Уяўляючы Беларусь: ідэі і вобразы для супольнай будучыні» ладзяць імпрэзу ў Брэсце.

Перад берасцейцамі з адкрытай лекцыяй «Колер і стыль як маркеры ідэнтычнасці» выступіць вядомы культурны дзеяч, дызайнер, графік, аўтар знакавых песенных тэкстаў для беларускіх рок-выканаўцаў, аўтар тэкстаў і канцэпцыі праекта «Народны альбом» Міхал Анемпадыстаў.

Што ўплывала на фармаванне традыцыі беларусаў, нашых уяўленняў пра стыль? Як складвалася гісторыя каларыстычных упадабанняў нашых продкаў? У якіх гістарычных крыніцах мы знаходзім увасабленне і адлюстраванне асноўных колераў? Якую ролю адыгрывае каларыстыка ў нашай матэрыяльнай і нематэрыяльнай культуры, у штодзённым жыцці кожнага беларуса?

Разважаючы разам з лектарам пра мноства гістарычных фрагментаў і наслаенняў, з якіх складаецца Беларускі стыль, мы паспрабуем зразумець логіку яго фармавання і функцыянавання ў культуры сучасных беларусаў, а таксама тое, якую ролю адыгрывае стыль і, у прыватнасці, нашыя каларыстычныя ўпадабанні, у працэсе самаідэнтыфікацыі, пошуку саміх сябе ў гістарычнай і прасторавай адлегласці.

Адкрытая лекцыя Міхала Анемпадыстава «Колер і стыль як маркеры ідэнтычнасці» адбудзецца 26 лістапада, у суботу, у прасторы тэатра «Крылы халопа» (Брэст, вул. Халтурына, 2/1). Пачатак у 18.00. Уваход вольны!

Нумар тэлефона каардынатара ў Брэсце: (+375 29) 8231916 (Святлана).

Матэрыялы і відэазапісы папярэдніх лекцый і анонсы наступных падзей Лятучага ўніверсітэта шукайце на сайце: http://fly-uni.org.

UPD.: Відэазапіс адкрытай лекцыі: