Лятучы ўніверсітэт запрашае на адкрыццё выставы Міхала Анемпадыстава «Колер Беларусі», якая ладзіцца ў межах міжнароднага праекта па развіцці культурнай спадчыны CHOICE.

Што такое «колер» і чаму ён феномен культуры? Якія колеры першымі атрымалі свае імёны ў нашых далёкіх продкаў? Чые каларыстычныя трэнды мы перанялі і як пераасэнсавалі? Якім чынам колеры фармуюць самаідэнтычнасць?

«Колер Беларусі» — гэта міждысцыплінарнае даследаванне Міхала Анемпадыстава:

«Я даследую гісторыю і ролю колераў у беларускай культурнай традыцыі, ці, калі быць дакладным, у тых культурных традыцыях, якія ўтваралі аснову для паўстання беларускай культуры і з’яўляюцца яе неад’емнымі часткамі».

На выставе будзе прадстаўлена візуальная частка даследвання — аб'екты, якія з'яўляюцца носьбітамі ўлюбёных колераў беларускай культурнай традыцыі. Носьбіты гэтыя розныя. Некаторыя з іх архетыпічныя, а разам з тым, настолькі звычайныя, што мы перасталі звяртаць на іх увагу. Іншыя забыліся, зацерліся, зафарбаваліся пазнейшымі культурнымі напластаваннямі і чакаюць на сістэмнае, руплівае аднаўленне. Трэція маюць патрэбу ў дадатковым паясненні кантэкста, семантыкі і сэнсаў.

Лятучы ўніверсітэт запрашае на выставу мастака і дызайнера Міхала Анемпадыстава «Колер Беларусі», якая будзе працаваць з 28 лютага да 24 сакавіка 2017 года ў галерэі Беларускага саюза дызайнераў (Мінск, вул. Брылеўская, 14, уваход са двара). Імпрэза з нагоды адкрыцця выставы адбудзецца 28 лютага, у аўторак. Пачатак у 19.00. На імпрэзу, як і на ўласна выставу, — уваход вольны!

Выстава папярэднічае выхаду ў свет аднайменнай манаграфіі, прэзентацыя якой плануецца ў сакавіку сёлета.

Падрабязную інфармацыю пра выставу «Колер Беларусі» і падзеі ў яе межах шукайце на сайце www.fly-uni.org.

Сачыце таксама за падзеяй ў Фэйсбуку.

Даведі наконт выставы можна атрымаць праз наступныя кантакты:

• Ліза Неўмяржыцкая: (+375 44) 7424832, [email protected];
• паштовая скрыня Лятучага ўніверсітэта: [email protected].