10 кастрычніка 2017 года Лятучы ўніверсітэт зарпашае ўсіх цікаўных у мінскую Галерэю «Ў» на іправізаваны Дзень адчыненых дзвярэй.

Але выступаў, прэзентацый і лекцый не будзе. Вас чакаюць адкрытыя нефармальныя размовы з рознымі асобамі Лятучага за кубачкам кавы ці гарбаты.

Ужо восьмую восень Лятучы ўніверсітэт адчыняе дзверы і запрашае старых і новых сяброў да супольнай працы ў прасторы мыслення, культуры, грамадства, фармавання сябе і зменаў навокал. Адна з галоўных установак універсітэта палягае ў тым, што ідэі і думкі нараджаюцца ў дыялогу, у асяродку супольнай рэфлексіі і крытыкі, а сапраўднае навучанне мысленню магчымае толькі праз судачыненне і супрацу з Настаўнікам — інтэлектуалам, мастаком, навукоўцам, мысляром. На гэтай падставе і будуецца праца Лятучага ўніверсітэта.

10 кастрычніка Лятучы запрашае ўсіх цікаўных да адкрытай і шчырай размовы з асобамі Лятучага ўніверсітэта. У гэты дзень не будзе выступаў, прэзентацый і лекцый, але будуць людзі з іх справай, якую яны робяць у Лятучым. З кожнай асобай вы зможаце паразмаўляць сам-насам альбо ў невялічкай кампаніі іншых зацікаўленых на працягу 20 хвілін, а пасля перайсці да іншага героя. Запіс на сёлетнюю праграму сканчаецца акурат у гэты дзень, таму гэта добрая нагода канчаткова вызначыцца са сваім асабістым шляхам у прасторы Лятучага!

Праз размовы з асобамі Лятучага вы даведаецеся пра тое, як працуе ўніверсітэт, пра нашу Дыстанцыйную платформу і новую праграму. Нашы сябры з «Жывой бібліятэкі» дапамогуць арганізаваць прастору такім чынам, каб вы маглі паразмаўляць з усімі, хто вам цікавы, задаць пытанні пра тое, што для вас важна, паспрабаваць паразумецца з рознымі прадстаўнікамі супольнасці Лятучага ўніверсітэта.

10 кастрычніка, у аўторак, у Галерэі «Ў» (Мінск, прасп. Незалежнасці, 37а) з 18.30 да 21.00 вы зможаце сустрэцца з наступнымі асобамі Лятучага ўніверсітэта:

• Уладзімір Мацкевіч — галоўны метадолаг і антыкамуніст Беларусі;
• Валянцін Акудовіч — літаратар, зачараваны мысленнем;
• Алена Верашчагіна — робіць Лятучы бачным і чутным;
• Ігар Бабкоў — гісторык ідэяў і філосаф «за небакраем Эўропы»;
• Зміцер Майбарада — настаўнік дыялогу пра каштоўнасці;
• Аліна Радачынская — аб’ядноўвае людзей, каб адкрываць дадзеныя;
• Павел Баркоўскі — герменэўт, праектны актывіст і магістр гульні;
• Лілія Ілюшына — верыць у гісторыю таму, што гэта абсурдна;
• Вячаслаў Бабровіч — галоўны настаўнік дэмакратыі;
• Іван Вядзенін — дэвіз «Інавацыі або смерць!»;
• Таццяна Вадалажская — не-сапраўдны рэктар.

Больш навінаў пра мерапрыемства і тых асобаў, з якімі магчыма будзе сустрэцца, можна знайсці ў мерапрыемстве на Фэйсбуку.