Да 5 лютага 2018 года Лятучы ўніверсітэт прымае заяўкі на адкрытыя курсы другога семестра.

На пачатку 2018 года мы прапануем комплекс курсаў, якія дазволяць паглыбіцца ў аналіз сучасных зменаў у сацыяльным, палітычным і культурным жыцці, што звязаныя з імклівым тэхналагічным і інавацыйным развіццём.

Інавацыі актыўна, настойліва і, часцей за ўсё, «не пытаючыся ў нас» змяняюць асяродак, у якім мы жывем і дзейнічаем. З аднаго боку, яны ставяць новыя задачы і кідаюць выклікі ў самых розных сферах — права, ідэнтычнасць чалавека, сацыяльная справядлівасць, занятасць, чалавечыя адносіны і г.д. З іншага боку, кожная інавацыя мае наступствы, якія вельмі рэдка становяцца прадметам клопату, разважанняў або дзеянняў саміх інаватараў. У выніку, мы апынаемся непадрыхтаванымі да зменаў як у бліжэйшай, так і ў аддаленай будучыні.

А як увогуле можна падрыхтавацца да непрадказальных зменаў? Падрыхтавацца — азначае, найперш, здольнасць бачыць, разумець і мець інтэлектуальныя і практычныя інструменты для дзеяння. Другая, не менш важная задача — гэта гуманітарная падрыхтоўка да камунікацыі і сустрэчы з Іншым. Прапанаваныя курсы — спроба разам з беларускімі мыслярамі і адмыслоўцамі рухацца да разумення сучасных працэсаў.

Аб’ектам цікавасці стане сацыяльнае і гуманітарнае вымярэнне інавацыйных зрухаў, найперш, праз асваенне розных метадаў, моваў і падыходаў, праз якія мы можам працаваць з гэтамі з’явамі. Гэта мова мастацтва, камунікатыўныя і герменеўтычныя практыкі, крытэрыі і прынцыпы для вылучэння праблемаў, метады праектавання. Гэта новыя сацыяльныя, эканамічныя і філасофскія тэорыі, што даюць інструменты аналізу і дзеі.

Курсы і школы другога семестра:

• «Тры глабальныя праблемы сучаснасці», выкладаюць: Андрэй Ягораў, Уладзімір Мацкевіч;
• «Пасля будучыні: медыябум і новыя вымярэнні сацыяльнага«, выкладае: Максім Жбанкоў;
• «Трансфармацыя чалавечага самаразумення ў эпоху біятэхналогій», выкладае: Таццяна Шчытцова;
• «Чатыры сустрэчы з Іншым: ключавыя ракурсы сучаснага дыялагізму», выкладае: Зміцер Майбарада;
• «Псіхааналіз і палітыка», выкладае: Галіна Русецкая;
• «Школа Бібліі: герменэўтыка базавых тэкстаў культуры» Ірыны Дубянецкай;
• «Інстытуцыяналізм у эканоміцы, праве, гісторыі і палітыцы», выкладае: Аляксей Пікулік;
• «Сучасныя тэорыі суб’екта», выкладаюць: Павел Баркоўскі, Ігар Падпорын, Аляксандр Сарна, Галіна Русецкая.

Прапанаваныя курсы — гэта курсы першага ўзроўню для слухачоў Лятучага ўніверсітэта. Ён працуе як прастора засваення розных падыходаў у мысленні, гуманітарных і інтэлектуальных практык, знаёмства з актуальнымі і ўнікальнымі напрамкамі сучаснай беларускай думкі, пошуку свайго Настаўніка.

У другім семестры працягваюць сваю працу семінары:

• «Майя (маеўтыка ад Майбарады): сакратычныя дыялогі пра каштоўнасці» пад кіраўніцтвам Змітра Майбарады;
• «Блакчэйн: філасофія і практыка» пад кіраўніцтвам Андрэя Ягорава і Сяргея Казлоўскага;
• «Клуб дылетанта» пад кіраўніцтвам Вячаслава Бабровіча;
• таксама як універсітэцкі і метадалагічны семінары, пасяджэнні якіх абвяшчаюцца адмыслова і асобна.

Заяўкі прымаюцца да 5 лютага 2018 года.

Усе заняткі бясплатныя.

Заняткі будуць праходзіць па вечарох у працоўныя дні.

Каб запісацца, трэба перайсці па спасылцы на абраны курс.

Па дадатковых пытаннях можна звяртацца па адрасе электроннай пошты: [email protected].