Прадстаўнік Еўрапейскай службы знешніх дзеянняў Гунар Віганд высвятляе ўмовы, на якіх беларускі ўрад можа прыняць удзел у Саміце Усходняга партнёрства. У гэтым упэўнены палітолаг Андрэй Ягораў.

— Магчыма, у яго не было зараз канкрэтнага запрашэння да беларускіх уладаў і канкрэтнай прапановы пра ўзровень прадстаўніцтва. Але яны не маглі не весці перамоў на гэты конт. Еўрасаюз хоча быць упэўнены ў тым, што, адпраўляючы запрашэнне Беларусі, не будзе пасля нейкіх нечаканасцей і рэзкіх паводзін Беларусі, як гэта часта здараецца.

24 верасня Гунар Віганд заявіў, што не мае запрашэння да беларускіх чыноўнікаў на удзел у Саміце. Але, па яго словах, такое запрашэнне будзе накіравана афіцыйнаму Мінску. Невядомым застаецца, на якім узроўні Беларусь будзе прадстаўлена на Саміце.

* * *

Гунар Віганд не прывёз запрашэнне на ўдзел у Саміце Усходняга партнёрства прадстаўнікам беларускага ўраду. Але запрашэнне будзе накіравана ў Мінск так, як і іншым удзельнікам, кажа дырэктар Дэпартамента Расіі, Усходняга партнёрства, Цэнтральнай Азіі, рэгіянальнай супрацы і АБСЕ Еўрапейскай службы знешніх дзеянняў Гунар Віганд:

— Мы чакаем удзелу Беларусі у гэтым Саміце — гэта гарантавана. Але я не магу сказаць пра ровень гэтага ўдзелу. Гэта рашэнне прымаецца не мной, а іншымі высокапастаўленымі асобамі.

Гунар Віганд адзначае, што Еўрапейскі Саюз па-ранейшаму прытрымліваецца пазіцыі вызвалення палітзняволеных — як умовы ўдзелу афіцыйнага боку у Еўрапейскім дыялогу па мадэрнізацыі (ЕДМ).

* * *

Уцягнуць афіцыйны Мінск у Еўрапейскі дыялог па мадэрнізацыі Беларусі. Гэта адна з мэт візіту дырэктара Дэпартамента Расіі, Усходняга партнёрства, Цэнтральнай Азіі, рэгіянальнай супрацы і АБСЕ Еўрапейскай службы знешніх дзеянняў Гунара Віганда:

—  Cтавілася пытанне наконт магчымасці удзелу ўраду краіны ў Еўрапейскім дыялогу па мадэрнізацыі. У нас ёсць канкрэтны шанец — прапанова ўжо ляжыць на стале беларускага ўраду — абмеркаваць пытанне падпісання дамовы наконт змякчэння візавага рэжыму і дамовы пра рэадмісію.

Пагадненне пра спрашчэнне візавага рэжыму з Азербайджанам плануецца падпісаць на Саміце Усходняга партнёрства у Вільні. У хуткім часе ўступіць у сілу такое ж пагадненне з Арменіяй.

* * *

Мадэрнізаваць еўрапейскую праграму «Еўрапейскі дыялог па мадэрнізацыі для Беларусі» збіраюцца эксперты, якія былі запрошаныя ў Мінску на сустрэчу з дырэктарам Дэпартамента Расіі, Усходняга партнёрства, Цэнтральнай Азіі, рэгіянальнай супрацы і АБСЕ Еўрапейскай службы знешніх дзеянняў Гунарам Вігандам.

Ен сустрэўся з экспертамі, запрошанымі да праграмы, і з прадстаўнікамі палітычных партый.

Дырэктар Цэнтра еўрапейскай трансфармацыі Андрэй Ягораў адзначае, што праграма, якая дзейнічае з сакавіка мінулага года, застаецца на ўзроўні напрацовак экспертаў, з якіх нічога не вынікае:

— Палітычнага складніка ў Еўрапейскім дыялогу па мадэрнізацыі так і не ўтварылася. Еўрапейская камісія і Еўрапейская служба знешніх дзеянняў не зрабілі нічога, каб ЕДМ развіваўся ў больш палітычную плоскасць, а абмяжоўвалі гэта да ўзроўня працы экспертных груп.

Я і мае калегі настойваем на змене фармату Еўрапейскага дыялогу па мадэрнізацыі дзеля большага ўключэння грамадска-палітычных суб’ектаў у вызначэнне мэт, сутнасці, структур ЕДМ і г.д. Але да сённяшняга часу мы сустракаем супраціўленне еўрапейскіх структур. Ёсць пэўныя, магчыма, спадзяванні, што калі мы будзем толькі з экспертамі размаўляць, до дзяржава далучыцца да гэтых абмеркаванняў.

Апошні раз Гунар Віганд наведаў Мінск у снежні мінулага года. Тады ён сустрэўся з міністрам замежных спраў Беларусі Уладзімірам Макеем. І сёння найважнейшая задача Віганда — перадаць запрашэнне Макею на Саміт Усходняга партнёрства ў Вільні, адзначаюць эксперты.

Цалкам размову слухайце ў далучаным гукавым файле.

* * *

Прадстаўнік Еўрапейскай службы знешніх дзеянняў падтрымаў прапанову пашырыць удзел у Еўрапейскім дыялогу па мадэрнізацыі палітычных сіл і грамадзянскай супольнасці.

Заява Нацыянальнай платформы Форума грамадзянскай супольнасці Усходняга партнёрства на гэты конт была апублікаваная напярэдадні прыезду у Мінск Гуннара Віганда. Падчас сустрэчы з экспертамі ЕДМ Гуннар Віганд выказаў спадзеў, што дыялог будзе рухацца далей у прапанаваным фармаце, кажа прадстаўнік Нацыянальнай платформы Андрэй Ягораў:

— Гуннар Віганд падкрэсліў, што праект накіраваны перш за ўсё на падтрымку дыялогу. Ён выказаў меркаванне, што інтарэсы стэйкхолдэраў павінны быць ўлічаныя, іх удзел і кансультацыі з імі павінны быць пашыраныя. 

Андрэй Ягораў падкрэсліў, што пакуль гэта толькі прапанова , а не рашэнне еўрапейскага боку.

Паводле Беларускага Радыё Рацыя