29 чэрвеня 2015 года Цэнтр еўрапейскай трансфармацыі прадстаўляе вынікі маніторынгу сферы культуры Беларусі «Культура як фактар развіцця».

Маніторынг накіраваны на адсочванне рэалізацыі Рэспублікай Беларусь Канвенцыі ЮНЕСКА «Аб ахове і падтрымцы разнастайнасці форм культурнага самавыражэння».

Беларусь з’яўляецца ўдзельніцай Канвенцыі ЮНЕСКА «Аб ахове і падтрымцы разнастайнасці форм культурнага самавыражэння». Канвенцыя абавязвае дзяржавы заахвочваць і развіваць умовы для культурнай разнастайнасці, узмацняць магчымасці сферы культуры ў развіцці грамадства і чалавека, пашыраць магчымасці самавыражэння культурных груп і асобных людзей.

Як замераць эфекты рэалізацыі Канвенцыі ў Беларусі? Ці адпавядае стан культуры каштоўнасцям вольнага развіцця і самавыражэння? Што і каму трэба рабіць, каб рухацца ў развіцці культуры Беларусі?

Мэта маніторынгу — прадставіць супастаўныя характарыстыкі для адсочвання змяненняў у сферы культуры ў рамках мэт і задач Канвенцыі і стварыць падставы для публічнага абмеркавання стану сферы культуры і перспектыўных напрамкаў рэалізацыі культурнай палітыкі ў Беларусі.

Стан культуры вымяраўся па пяці накірунках:

• Умовы для развіцця і праявы культурнай разнастайнасці;
• Уплыў сектара культуры на развіццё грамадства;
• Развіццё міжкультурнага ўзаемадзеяння і кантактаў;
• Унутраныя рэсурсы і патэнцыял развіцця сферы культуры;
• Узаемадзеянне розных суб'ектаў культурнай палітыкі.

Даследаванне ўключала ў сябе аналіз прававой базы рэалізацыі Канвенцыі, сбор і сістэматызацыю статыстычных звестак і аб’ектыўных паказчыкаў і экспертныя ацэнкі па пяці вымярэннях Канвенцыі.

Вынікі даследавання сабраны ў справаздачы, якая будзе прадстаўлена для крытыкі і абмеркавання.

У праграме мерапрыемства:

• Прадстаўленне вынікаў маніторынгу даследчай групай;
• Агульнае абмеркаванне высноў і прапаноў;
• Дыскусія экспертаў аб магчымасцях выкарыстання вынікаў і перспектыўных напрамках культурнай палітыкі

Запрашаем усіх зацікаўленых асоб узяць удзел у прэзентацыі і дыскусіі 29 чэрвеня 2015 года, з 10.00 да 14.00, у Крэатыўнай прасторы «ЦЭХ» (Мінск, вул. Кастрычницкая, 16).

Просім вас да 26 чэрвеня 2015 года пацвердзіць свой удзел у мерапрыемстве праз адрас электроннай пошты: [email protected] або па нумары тэлефона: (+375 44) 5638517 (Таццяна Кедрык).

Гл. таксама: «Дорожная карта» для продвижения Беларуси в рамках инициативы «Восточное партнерство»: контакты между людьми в сфере культуры

UPD. Справаздача маніторынгу рэалізацыі Рэспублікай Беларусб канвенцыі ЮНЕСКА