11 лістапада 2015 года Лятучы ўніверсітэт запрашае слухачоў наведаць чарговую адкрытую лекцыю ў серыі «Галоўнае пытанне».

Паэт і мысляр, «вялікі алхімік сэнсу» Алесь Разанаў запрашае да чытання верша і пошуку сэнсаў — прамоўленых у ім відавочна і тых схаваных, яшчэ непамысных, якія чакаюць сваго кантэксту, гатовыя адгукнуцца на імпульсы новых асацыяцый. Такая свайго роду археалагічная праца з тэкстам патрабуе ад чытача адмысловага зроку і слыху, здольных утрымліваць гэтую сэнсавую напластаванасць. У пэўны момант можна нават адчуць сваю несувымернасць таму сусвету, які адкрывае перад намі герменеўтыка верша. Але варта затрымацца на гэтым памежжы сваіх магчымасцей розуму і таго немагчымага і пакуль непазнанага, бо менавіта там і ўзнікаюць «галоўныя пвтанні».

Калі мы будзем далей углядацца і ўслухоўвацца

ў істоту твора, мы раптам, магчыма,

адчуем далейшае, ці спачатковейшае, што

папярэднічае яму, і ў інтуітыўным пробліску

зразумеем, што тое, што ёсць цяпер,

ужо было да, што водгук папярэднічае гуку,

што знойдзенае прадумоўлівае шуканае,

што твор, у які мастак укладаецца з усёй сваёю

душою, ужо існаваў загадзя, што ён заўсёды існуе.

I чым ён больш дасканалы, тым больш ён існы.

Алесь Разанаў, «Слова пра спадчыну»

11 лістапада, у сераду, Лятучы ўніверсітэт у межах серыі адкрытых лекцый «Галоўнае пытанне» запрашае на лекцыю паэта Алеся Разанава «Невядомая велічыня: чытаем верш». Пачатак у 18.30.

Слухачоў просім папярэдне зарэгістравацца. Інфармацыя пра месца правядзення будзе дасланая зарэгістраваным удзельнікам напярэдадні.

Расклад і тэмы далейшых лекцый глядзіце на сайце Лятучага ўніверсітэта: www.fly-uni.org.

UPD.: Відэазапіс адкрытай лекцыі:

Гл. таксама справаздачу аб адкрытай лекцыі Алеся Разанава