Каардынацыйная каманда беларускай часткі міжнароднага праекта «CHOICE — Cultural Heritage: Opportunity for Improving Civic Engagement» падсумоўвае першы этап конкурса прапаноў: з 60 заявак 15 праходзяць у другі тур.

«Праца па адборы стала няпростай, але выключна цікавай, за што найперш трэба падзякаваць самім заяўнікам, многія з якіх — моцныя фігуры ў культуры краіны, якія ведаюць праблемы культуры з практыкі і здольныя прапанаваць цікавыя ідэі», — зазначае каманда беларускай часткі праекта «CHOICE-Беларусь: спадчына і сучаснасць».

Па сваёй праблематыцы пададзеныя 60 праектаў пацвердзілі некалькі актуальных патрэбаў у сацыякультурным полі Беларусі: павышэнне культуры памяці, захаванне традыцыйных творчых практык; сістэматызацыя і практычнае выкарыстанне як шырокіх, так і вузкіх гістарычна-культурных дадзеных; забяспечанне анлайн-даступнасці ўжо назапашаных ведаў аб беларускай культурнай спадчыне; фармаванне стратэгій мясцовага развіцця на аснове моцнай культурнай ідэнтычнасці і павышэнне якасці жыцця сродкамі культуры.

Усе творчыя канцэпцыі прайшлі падрабязны аналіз і былі разгледжаныя 5 экспертамі. Ацэнка праектаў адбывалася паводле спецыяльнай сістэмы ацэнкі і анкеты па наступных крытэрах: рэлевантнасць, эфектыўнасць і рэалізуемасць праекта ў абазначаных часовых і рэсурсных рамках.

У другі тур адбору праходзяць 15 заяўленых крэатыўных канцэпцый.

Геаграфія праектаў, што прайшлі прамежкавы адбор, ахоплівае ўсю нашу краіну: абласныя гарады, некаторыя цэнтры рэгіёнаў, а таксама асяродкі, створаныя сталічнымі супольнасцямі ў рэгіёнах. Спектр тэм падтрыманых крэатыўных канцэпцый вельмі шырокі: гэта як матэрыяльная, так і нематэрыяльная культурная спадчына, мастацтва (ад народнага да сучаснага), дызайн, тэатр і іншыя сцэнічныя практыкі, спадчына мастацкіх школ і этнічных супольнасцей, праца з культурным ландшафтам і музейная педагогіка.

Кожная з падтрыманых канцэпцый адлюстроўвае не толькі культурную спадчыну Беларусі, але і сучасныя выклікі, якія стаяць перад усімі намі, яе нашчадкамі. Гэта выклікі інтэрпрэтацыі, пераасэнсавання і ўвядзення здабыткаў культуры ў сацыякультурны кантэкст, ва ўжытак грамадствам.

Арганізацыі, якія не прайшлі па конкурсе ў другі тур, тым не менш, змогуць скарыстацца іншымі магчымасцямі праекта: знайсці партнёраў ва Украіне, Арменіі, Малдове, атрымаць кансультацыі, прыняць удзел у канферэнцыі, адукацыйных і дыскусійных мерапрыемствах, якія будуць абвешчаныя пазней у праграме на 2016 год.

Заяўнікі праектных канцэпцый, якія прайшлі на другі этап конкурса «CHOICE-Беларусь: спадчына і сучаснасць», пры дапамозе кансультантаў і трэнераў праграмы працягнуць далейшую інтэнсіўную працу над сваімі праектамі да 20 студзеня 2016 года. Адбор на другім туры будзе не менш сур’ёзны: толькі з 6-7 праектамі будзе працягнутая праца. Тым не менш, для ўсіх 15 пераможцаў першага тура ёсць дзве дадатковыя магчымасці:

• атрымаць важны досвед арганізацыйнай ацэнкі і фармавання стратэгіі развіцця пад куратарствам кансультанта;
• прыняць удзел у прафесійных семінарах і міністажыроўках у профільных арганізацыях у Беларусі, Украіне, Малдове і Арменіі.

Усе 60 удзельнікаў конкурса атрымаюць лісты з каментарамі па сваіх праектаў ад экспертаў «CHOICE-Беларусь: спадчына і сучаснасць» да 20 лістапада 2015 года (уключна).

Сачыце за навінамі праекта на сайце EuroBelarus.Info.