Суд Першамайскага раёна Мінска 16 сакавiка разглядзеў справу журналісткі Дзіяны Серадзюк.

Суд Першамайскага раёна Мінска разглядаў справу журналісткі Службы інфармацыі «ЕўраБеларусі» Дзіяны Серадзюк. Яе вінавацілі ў парушэнні арт. 23.34 КаАП (парушэнне парадку арганізацыі ці правядзення масавых мерапрыемстваў). Сведкі падчас суда заявілі пра фальсіфікацыі пратаколаў.

Рабочыя ААТ «Белрэканструкцыя», якія выступалі з боку абвінавачвання, заявілі падчас працэсу, што ім прыносілі на подпіс гатовыя пратаколы. Да тагож яны не знаёміліся з дакументамі цалкамі, а толькі слухалі вытрымкі, якія зачытвалі міліцыянты.

Ніякіх фотаздымкаў Дзіяны Серадзюк для апазнання ім раней не паказвалі, а ў пратаколах пра гэта сцвярджалася.

Такім чынам суд прызнаў адсутнасць віны ў парушэнні парадку арганізацыі ці правядзення масавых мерапрыемстваў журналісткі Дзіяны Серадзюк.

Журналістка апраўданая, справа закрытая.

Адзначым, журналістам цягам апошніх дзён прад’яўляюць абвінавачванні ў парушэнні арт. 23.34 КоАП (парушэнне парадку арганізацыі ці правядзення масавых мерапрыемстваў). Адпаведныя пратаколы, да прыкладу, былі складзеныя на журналістку-фрылансерку з Гомеля Ларысу Шчыракову. Таксама позву ў Цэнтральны РАУС Гомеля на 15 сакавіка атрымаў старшыня Гомельскай філіі ГА «БАЖ» Анатоль Гатоўчыц, які быў у Рагачове ад інфармацыйнай кампаніі БелаПАН падчас нядзельнай акцыі пратэсту. Яго выклікаюць у сувязі з адміністрацыйным парушэннем паводле арт. 23.34 КаАП.