30 верасня 2015 года Лятучы ўніверсітэт распачынае ўніверсітэцкі год серыяй адкрытых лекцый «Галоўнае пытанне». Першым з прамовай да слухачоў зверніцца філосаф і метадолаг Уладзімір Мацкевіч.

Што такое невядомае? Гэта ўсё тое, што немагчыма ўбачыць вачыма і памацаць рукамі, што не дадзенае нашым органам пачуццяў. Але дапытлівы чалавечы розум заўсёды — з таго часу, як з’явіўся ў Сусвеце, — спрабуе пракрасціся ў невядомае, зазірнуць у будучыню.

Чалавек імкнецца прадказваць будучыню праз навуку: «Што здарыцца альбо адбудзецца, калі...» Прадказанні ў навуцы будуюцца на дапушчэнні, што ўсё ў Сусвеце падпарадкоўваецца аб’ектыўным законам, і пазнанне гэтых законаў дазваляе вылічаць або прадказваць тое, што будзе. Прадказальная сіла навукі грунтуецца на заканамернасці і законаадпаведнасці прыроды і Сусвету.

Пазнаваць і прадказваць будучыню чалавек спрабуе і праз рэлігіі (прынамсі «аўраамічныя» рэлігіі: юдаізм, хрысціянства, іслам). У адрозненні ад навукі, рэлігіі зыходзяць з «тварнасці» або стварэння Сусвету. Раз Сусвет быў створаны, значыць, у Творцы была мэта. Імкнучыся спазнаць гэтую мэту, багаслоўе спрабуе пазнаваць тое, што будзе. Такім чынам, прадказальная сіла рэлігіі грунтуецца на мэтазгоднасці прыроды і Сусвету і на разумнасці і дабрыні Творцы.

Сучасная філасофія зыходзіць з таго, што ні веданне аб’ектыўных законаў, ні ўяўленне пра мэты Творцы, не робяць будучыню прадвызначанай, прадказальнай.

Свет непрадказальны. Як магчыма засірнуць у будучыню, калі яна не мэтазгодная і не законаадпаведная?

30 верасня 2015 года, у сераду, пра гэта паразважае падчас адкрытай лекцыі «Што можна ведаць пра непрадказальнае, або Што мы ведаем пра будучыню?» філосаф і метадолаг Уладзімір Мацкевіч. Лекцыя пройдзе ў Галерэі «Ў» (Мінск, прасп. Незалежнасці, 37а). Пачатак у 18.30. Уваход вольны!

Гэтай прамовай Лятучы ўніверсітэт распачынае новы ўніверсітэцкі год і серыю адкрытых лекцый «Галоўнае пытанне». Cярод наступных лектараў: Алесь Смалянчук, Ігар Бабкоў, Таццяна Вадалажская, Алесь Разанаў, Вячаслаў Бабровіч, Аксана Шэлест, Міхаіл Баярын, Святлана Карасёва, Ірына Махоўская, Алег Дзярновіч, Міхал Анемпадыстаў.

Лекцыі будуць праходзіць штотыдзень па серадах, пачатак — у 18.30. Удзел у іх — вольны, пры ўмове абавязковай папярэдняй рэгістрацыі (акрамя першай лекцыі ад 30 верасня).

Больш падрабязную інфармацыю пра лекцыі — расклад, тэмы, умовы ўдзелу — шукайце на сайце Лятучага ўніверсітэта: www.fly-uni.org.

Падпісацца на рассылку анонсаў, задаць пытанні, удакладніць дэталі можна праз адрас электроннай пошты: [email protected] (у тэме ліста просьба пазначаць назву серыі «Галоўнае пытанне»), або звярнуўшыся да каардынатара серыі лекцый — Юліі Галіноўскай — па нумары тэлефона: (+375 29) 7422040.

UPD.: Відэазапіс адкрытай лекцыі:

Гл. таксама:

• Інтэрв'ю з Уладзімірам Мацкевічам напярэдадні лекцыі

• Тэкст расшыфроўкі адкрытай лекцыі Уладзіміра Мацкевіча

• Справаздача аб адкрытай лекцыі Уладзіміра Мацкевіча