Фото: svaboda.org

15 верасня ў Варшаве распачаў працу ўжо сёмы па ліку Міжнародны Кангрэс даследчыкаў Беларусі. Галоўная акадэмічная падзея года будзе доўжыцца тры дні і завершыцца ў нядзелю, 17 верасня.

Сёлета Міжнародны Кангрэс даследчыкаў Беларусі ўпершыню ладзіцца не ў літоўскім Коўне, як гэта было мінулыя разы, а ў сталіцы Польшчы.

Па словах арганізатараў Кангрэса, на яго сабраліся каля 600 даследчыкаў як з Беларусi, так i з іншых краін свету. Больш за трэць з іх — прадстаўнікі Польшчы. Навукоўцы будуць працаваць у 17 секцыях.

Кангрэс у Варшаве аказаўся самым масавым і з пункту гледжання колькасці ганаровых гасцей, якія выступілі падчас цырымоніі адкрыцця. Вітальныя словы ад дыпламатаў і навукоўцаў, якія гучалі падчас урачыстага адкрыцця форума ў Ратушнай зале варшаўскага Палаца культуры і навукі, казаліся на беларускай, польскай, англійскай мовах.

Адразу па ўрачыстай цырымоніі адбылася пленарная дыскусія «Рэвалюцыя 1917 года і досвед камунізму для Цэнтральна-Усходняй Еўропы», нагодай для якой стаўся 100-гадовы юбілей Кастрычнiцкай рэвалюцыi.

У дыскусіі прынялі ўдзел беларускі філосаф і метадолаг Уладзімір Мацкевіч і нямецкія гісторыкі Фелікс Акерман і Томас Бон. Мадэратарам дыскусіі выступіў сацыёляг з Беларусі Аляксей Ластоўскі. Удзельнікі публічнай размовы спрабавалі разабрацца, якім чынам спадчына камунізму працягвае ўплываць на культурнае і палітычнае развіццё як Беларусі, так і рэгіёна.​

Тэлеканал «Белсат» вёў стрым-трансляцыю цырымоніі адкрыцця і пленарнай дыскусіі:

Акрамя тэмы таталiтарызму ў ХХ стагоддзі сёлетнi Кангрэс таксама прысвечаны 500-годдзю друкаванай кнігі ў Беларусі. Гэтая тэма будзе падымацца на лiгвiстычных секцыях.

Асаблівая ўвага падчас Кангрэса таксама будзе нададзена пытанням бяспекі. Не абмінуць адмыслоўцы і вайсковыя вучэнні «Захад-2017».

Адметнае мерапрыемства ў рамках Кангрэса — узнагарода за найлепшую навуковую публiкацыю за 2015-2016 гады. Яны пройдзе 16 верасня ў Польскай Акадэмii навук.

Нагадаем, што Міжнародны кансорцыум «ЕўраБеларусь» з’яўляецца суарганізатарам Міжнароднага Кангрэса даследчыкаў Беларусі.

Падрыхтавана паводле матэрыялаў: Belsat.eu, Радыё «Свабода», «Еўрарадыё», Thinktanks.by ды інш.

Гл. таксама:

• Андрэй Казакевіч: Кангрэс даследчыкаў Беларусі аб’яднае рэвалюцыю 1917 года і Біблію Скарыны

• Стрым-праграма «Гарызонт падзей: Даследаванне даследчыкаў» — з Аксанай Шэлест і Андрэем Казакевічам (Відэа)