Яшчэ за паўгадзіны да пачатку прадстаўнікі абодвух бакоў казалі, што яе не будзе... Сустрэча Пятра Парашэнкі ды Уладзіміра Пуціна на ўчорашнім саміце ў Мінску адбылася позна ўвечары і прайшла з зачыненымі дзвярыма. Надзея, што бакі калі не дамовяцца, то прынамсі паразмаўляюць пра лёс соцень тысяч людзей на ўсходзе Украіны, не апраўдалася. Бо, маўляў, і цяпер Расія да гэтага канфлікта дачынення не мае.

Уладзімір Пуцін, прэзідэнт Расійскай Федэрацыі:

«Мы не можам, мы, як Расія, мы не можам размаўляць пра нейкія ўмовы прыпынення агню, пра магчымыя дамоўленасці паміж Кіевам, Данецкам і Луганскам. Гэта не нашая справа, гэта ўнутраная справа самой Украіны».

Такая пазіцыя адразу паставіла пад пытанне не толькі эфектыўнасць, але і сэнс усяго саміта. Бо калі падчас трохбаковай сустрэчы больш увагі звярталі на Дамову аб асацыяцыі Украіны ды Еўрасаюза, то ў размове Пуціна і Парашэнкі галоўным пытаннем сталі ўсяго газавыя перамовы Кіева і Масквы.

Андрэй Ягораў, Цэнтр еўрапейскай трансфармацыі:

«Яна адмаўляе фактычна наяўныя рэчы, і ў гэтым сэнсе немагчыма ніяк вызначыць сваю пазіцыю наконт адносін з Расіяй. Гэта такая маніпуляцыйная тэхніка, якую выкарыстоўвае Пуцін і расійская дыпламатыя».

Адсутнасць пералому ў размовах падкрэсліў і Мінск. Бо калі нават у газавым пытанні Парашэнка з Пуціным дамовіліся працягнуць дыялог, то ў пытаннях, датычных падзеяў на ўсходзе Украіны...

Аляксандр Лукашэнка, кіраўнік Беларусі:

«На жаль, сітуацыя там зайшла настолькі далёка, што без прынцыповых рашэнняў на найвышэйшым узроўні ніякія асобныя крокі ды тэхнічныя дамовы не прывядуць да ўрэгулявання».

І прынцыповых рашэнняў не было. Пятро Парашэнка пракаментаваў мінскі саміт толькі сёння. З прычыны адсутнасці рэальных вынікаў засталося толькі падкрэсліць сваю ранейшую нязменную пазіцыю.

Пятро Парашэнка, прэзідэнт Украіны:

«Перамовы былі вельмі эфектыўныя. На іх было падкрэслена, што ніякага гандлю вакол суверэнітэта і тэрытарыяльнай цэласнасці, незалежнасці нашай дзяржавы, суверэннага еўрапейскага выбару нашага народу не можа быць».

Hевядома, у якім фармаце і калі працягнуцца размовы. У Мінску будзе працаваць трохбаковая кансультацыйная група, аднак месца наступнай сустрэчы на больш высокім узроўні вагаецца ад Анкары, дзе Пятро Парашэнка нібыта ўжо заўтра мае сустрэцца з Нурсултанам Назарбаевым, да Астаны, куды б мог завітаць і Уладзімір Пуцін. Прычым калі Расія мае дастаткова магчымасцяў паўплываць на Украіну, як фінансава, гэтак і вайскова, то ў Кіева сродкаў менш.

Андрэй Ягораў, Цэнтр еўрапейскай трансфармацыі:

«У Кіева амаль што ніякіх рычагоў уздзеяння на гэтую сітуацыю няма, акрамя вельмі хуткага і больш рашучага заканчэння антытэрарыстычнай аперацыі на ўсходзе і ўсталявання міру сілавым спосабам. Гэта можа паўплываць на тое, што будзе адбывацца, але разумейце, што гэта вельмі і вельмі складана».

Асабліва цяпер, калі струмень дапамогі сепаратыстам з Расіі істотна пашырыўся, а наступ сіл антытэрарыстычнай аперацыі прыпыніўся фактычна на ўсім фронце.

Belsat.eu