Прысягнуў у вернасці «Саюзнай дзяржаве» і атрымаў падтрымку Пуціна на выбарах — Аляксандр Лукашэнка наведаў форум рэгіёнаў Расіі і Беларусі ў Сочы, дзе правёў перамовы з расійскім калегай. Эксперты, аднак, задаюцца пытаннем: колькі будуць каштаваць цёплыя словы кіраўніка Расіі?

Уладзімір Пуцін пажадаў кіраўніку Беларусі поспеху на выбарах. І гэта хіба найважнейшая заява для Аляксандра Лукашэнкі, якая публічна прагучала падчас форума рэгіёнаў Расіі і Беларусі. На афіцыйнай частцы сустрэчы прэзідэнт Расіі адзначыў, што найбліжэйшым часам будзе рабіцца стаўка на вайсковыя тэхналогіі, і тут можа быць запатрабаваны беларускі досвед.

Уладзімір Пуцін, прэзідэнт Расіі:

«Урад Расійскай Федэрацыі падрыхтаваў праграму імпартазамяшчэння практычна ва ўсіх галінах, будуць запушчаныя 2,5 тысяч праектаў. Пры гэтым, гаворка ідзе найперш пра найбольш важныя тэхналогіі — тэхналогіі двайнога прызначэння».

Кіраўнік Беларусі ў традыцыйнай для сябе манеры запэўніў саюзніка, што ніякага развароту Беларусі ад Расіі не прадбачыцца. Паводле назіральнікаў, Масква не будзе замінаць размарожванню беларуска-еўрапейскіх стасункаў.

Уладзімір Мацкевіч, філосаф і метадолаг:

«Крэмль дазваляе гульні з Еўрасаюзам, але за гэта патрабуе стратэгічных саступак. Тая ж ваенная база і наогул большая частка саступак, якіх патрабуе Пуцін, — яны тычацца ваенных дачыненняў».

Суразмоўцы Belsat.eu звяртаюць увагу на тое, што ў доларавым эквіваленце таваразварот паміж краінамі знізіўся, і ў такой сітуацыі і Мінск, і Масква зацікаўленыя прынамсі ў падтрыманні на словах.

Паўлюк Быкоўскі, палітычны аглядальнік:

«Расія не бачыць іншай альтэрнатыўнай фігуры, але, з другога боку, мы памятаем, калі Расія гэта рабіла ў апошні момант, выбіўшы сабе ўжо саступкі».

Нягледзячы на аптымізм і заявы пра тое, што з расійскімі рэгіёнамі Беларусь мае наўпроставыя эканамічныя сувязі, свой выступ перад удзельнікамі форума Лукашэнка падсумаваў заяваю, што ў Еўразійскага эканамічнага саюза — даволі сур’ёзныя праблемы.