4-га верасня на IV Міжнародным Кангрэсе даследчыкаў Беларусі ў Коўне (Літва) абвясцілі пераможцаў Прэміі за лепшую навуковую публікацыю.

Прэмія Кангрэса за найлепшую навуковую публікацыю ў 2012-2013 гадах надавалася па трох намінацыях: гісторыя, сацыяльна-палітычныя навукі, гуманітарныя навукі.

Ацэнку намінаваных на Прэмію прац праводзілі больш за 30 экспертаў у розных навуковых галінах. У адрозненне ад мінулага года, сёлета Прэмія надавалась асобна: за найлепшую манаграфію і артыкул.

Урачыстую цырымонію вялі філосаф і літаратар Ігар Бабкоў і тэолаг Наталля Васілевіч. Узнагароды надавалі доктар гістарычных навук Валянцін Голубеў, філосаф і літаратар Валянцін Акудовіч і сацыёлаг Таццяна Вадалажская.

У намінацыі «Гісторыя. Манаграфіі» Прэмію атрымаў Алесь Белы за манаграфію «Хроніка Белай Русі: Імагалогія Беларусі ХІІ-ХVIII ст.».

Андрэй Ціхаміраў з артыкулам «Жаночыя вобразы ў «заходнерускай» нарацыі» стаў лепшым у намінацыі «Гісторыя. Артыкулы».

У намінацыі «Гуманітарныя навукі. Манаграфіі» лепшым стаў Уладзімір Лобач з працай «Міф. Прастора. Чалавек: беларускі традыцыйны ландшафт у семіятычнай перспектыве». 

Праца «Капитализм и тревога» прынясла Андрэю Горных перамогу ў намінацыі «Гуманітарныя навукі. Артыкулы».

Прэмію ў намінацыі «Сацыяльныя навукі» атрымаў Ігар Расолька за працу «Факторы воспроизводства беларусской идентичности в пограничных пространствах Польши и Литвы».

Пасля атрымання пераможцамі ўзнагарод, удзельнікаў Кангрэса чакаў канцэрт гітарыста і выканаўцы Яўгена Барышнікава.

Міжнародны кансорцыум «ЕўраБеларусь» шчыра віншуе навукоўцаў з перамогай!

Відэазапіс надання Прэміі Кангрэса:

Пачатак цырымоніі

Гісторыя: Лепшая манаграфія

Гуманітарныя навукі: Лепшая манаграфія

Гісторыя: Артыкул

Гуманітарныя навукі: Артыкул

Сацыяльна-палітычныя навукі: Лепшы артыкул

Спявае Яўген Барышнікаў