20 ліпеня 2018 года ў мінскай Галерэі «Ў» у межах праекта «Без выключэнняў! У працэсе» адбудзецца адкрытая дыскусія «Выключанасць vs. Выключнасць».

Кожны з нас у той ці іншай ступені перажываў вопыт выключэння ў самым шырокім сэнсе слова: ад звальнення да нядопуску да ўдзелу ў дзяржаўных выставах. Напэўна, гэтае глыбіннае асэнсаванне ўласнай выключанасці з таго ці іншага кантэксту можа разглядацца ў якасці адной з характарыстык нацыянальнай свядомасці беларусаў. Паступова пераўтвараючы гэтую «выключанасць» у «выключнасць». Прызвычаіўшыся да дыскурсу выключэння, мы ўжо пачынаем ім ганарыцца...

У адкрытай дыскусіі возьмуць удзел: філосафы Уладзімір Мацкевіч і Вольга Шпарага, мастак і пісьменнік Адам Глобус, рэжысёр Валянціна Мароз, псіхіятр Алег Айзберг, дырэктар Офіса па правах людзей з інваліднасцю Сяргей Драздоўскі, рэдактар Citydog.by Яся Каралевіч-Картэль і рэстаратар Вадзім Пракопьеў.

Мадэратар дыскусіі — праваабаронца Алена Танкачова.

Адкрытая дыскусія «Выключанасць vs. Выключнасць» пройдзе 20 ліпеня, у пятніцу, у мінскай Галерэі «Ў» (вул. Кастрычніцкая, 19, уваход з боку вул. Леніна са двара). Пачатак у 18.30. Уваход вольны!

Калі ў вас ёсць свая гісторыя «выключанасці», калі ласка, падзяліцеся ёю, апублікаваўшы ў любых сацыяльных медыя пад хэштэгамі: #безисключений ці #безвыключэнняў.